Դեկտեմբերի 27-ին ՀՀ ՊՆ վարչական համալիրում անցկացվել է կենտրոնական ապարատի ղեկավար կազմի տարեվերջյան ամփոփիչ խորհրդակցություն: Հեռահաղորդակցության միջոցների և տեսակապի շնորհիվ խորհրդակցությանը ներգրավված էր նաև բանակային զորամիավորումների հրամկազմը և Պաշտպանության բանակի ղեկավար կազմը: Այս մասին տեղեկացնում է ՊՆ կայքը:
Պաշտպանության նախարարությունում ամփոփվել են տարվա ընթացքում կատարված աշխատանքները
Աշխատանքների ամփոփմանը տեսակապի միջոցով մասնակցել են նաև բանակային զորամիավորումների ու Պաշտպանության բանակի հրամանատարական կազմերը
Տարեվերջյան ամփոփիչ խորհրդակցությանը մասնակցել են ՀՀ ԶՈՒ ԳՇ պետ, գեներալ-գնդապետ Յուրի Խաչատուրովը, պաշտպանության նախարարի, գլխավոր շտաբի պետի տեղակալները, վարչությունների պետեր, բարձրաստիճան այլ զինվորականներ և քաղաքացիական հատուկ ծառայողներ:
Բացելով խորհրդակցությունը` պաշտպանական գերատեսչության ղեկավարն ընդգծել է, որ Ամանորի և Սուրբ ծննդյան տոների նախաշեմին, ինչպես նաև տոնական և հետտոնական օրերին պետք է առավել կենտրոնացնել ջանքերը, պատճաշ և բարձր մակարդակով իրականացնել բոլոր միջոցառումները` հակառակորդի սադրանքներից ու ոտնձգություններից զերծ մնալու համար:
Խորհրդակցության ընթացքում ենթակա զորամասերում անցկացված ամփոփիչ ստուգումների նախնական արդյունքների, Ամանորի և Սուրբ ծննդի տոնական միջոցառումների նախապատրաստական աշխատանքների մասին տեսակապի միջոցով հաշվետու զեկույցներով հանդես են եկել բանակային զորամիավորումների հրամանատարները: Ներկայացվել են առաջնագծում և մշտական տեղակայման վայրերում զգոնության բարձրացմանն ուղղված միջոցառումները, ուսումնական հաջորդ տարվա նախապատրաստական փուլի աշխատանքների պլանավորման առանցքային հարցերը:
Տարվա ընթացքում կատարված աշխատանքների և առկա խնդիրների վերաբերյալ զեկույցներով են հանդես եկել նաև ՊՆ, ԶՈՒ, ԶՈՒ ԳՇ մի շարք վարչությունների պետեր` ընդգծելով, որ ուսումնական տարվա շրջանակում մարտական և զորահավաքային պատրաստականության, զորքերի մարտական պատրաստության և զինվորական կարգապահության բարձրացմանը նպատակաուղղված աշխատանքները շարունակվել են պլանային կարգով:
Ամփոփելով խորհրդակցությունը` պաշտպանության նախարարը տվել է մի շարք ցուցումներ և հանձնարարականեր` ներկայացնելով նաև 2015թ տարեմուտի ուղերձի առանցքային կետերը: Սեյրան Օհանյանը խորհրդակցության մասնակիցների ուշադրությունը հրավիրել է հատկապես տոնական օրերին զորամասերում ուժեղացված ռեժիմով վերահսկողություն սահմանելու, անձնակազմի զգոնությունը բարձրացնելու հարցերի վրա: Պաշտպանության նախարարը հրահանգել է նաև խիստ հետևողական լինել զորամասերում անհրաժեշտ ջեռուցման պայմաններն ապահովելու, անձնակազմի ցրտահարության դեպքերը բացառելու, ինչպես նաև ժամկետային զինծառայողների, հատկապես նորակոչիկների առողջական գանգատների նկատմամբ:
Խորհրդակցությունը եզրափակվել է ամանորյա շնորհավորանքներով ու բարեմաղթանքներով
Պաշտպանության նախարար Սեյրան Օհանյանը վստահություն է հայտնել, որ միասնական աշխատանքի շնորհիվ 2015-ին ազգային բանակը դարձյալ պատվով կհաղթահարի բոլոր դժվարությունները, ամուր կպաշտպանի մեր սահմանները և կապահովի հայ ժողովրդի խաղաղ արարումը:
Խորհրդակցությունը եզրափակվել է ամանորյա շնորհավորանքներով և առողջության, երջանկության, հանդուրժողականության, անձնական ու ծառայողական նորանոր հաջողությունների մաղթանքներով: