ՌԴ պաշտպանության նախարար Սերգեյ Շոյգուն այսօր՝ դեկտեմբերի 22-ին, հյուրընկալել է ՀԱՊԿ անդամ երկրների պաշտպանության նախարարներին՝ այդ թվում նաև Սեյրան Օհանյանին, և ուղեկցել նրանց ՌԴ պաշտպանության կառավարման ազգային կենտրոն, որտեղ ներկայացրել է դրա տեխնիկական հնարավորություններն ու գործառույթները։ Այս մասին հայտնում է ռուսաստանյան «Զվեզդա» հեռուստաալիքի կայքը։
Սեյրան Օհանյանն ու Սերգեյ Շոյգուն կառավարման կենտրոնում
Նշենք, որ պաշտպանության կառավարման ազգային կենտրոնի գլխավոր գործառույթը ՌԴ ուժային կառույցների հրամանատարական կետերից և արտակարգ ծառայություններից ստացած տեղեկատվության մշակումն ու դրա վերլուծության հիման վրա օպերատիվ որոշումների կայացումն է։
Կարևոր է նշել, որ ըստ աղբյուրի, օտարերկրյա հյուրերը առաջին անգամ են հնարավորություն ստանում այցելել վերոնշյալ կենտրոն։
Հավելենք, որ ՀՀ պաշտպանության նախարար Սեյրան Օհանյանը Մոսկվա է մեկնել մասնակցելու ՀԱՊԿ Պաշտպանության նախարարների խորհրդի նիստին։ Դեկտեմբերի 22-ի երեկոյան Մոսկվա է մեկնելու նաև նախագահ Սերժ Սարգսյանը, ով կմասնակցի ՀԱՊԿ Խորհրդի նստաշրջանին։
Հավաքական անվտանգության պայմանագրի կազմակերպությունը (ՀԱՊԿ) ռազմաքաղաքական բլոկ է, որին անդամակցում են Հայաստանը, Ռուսաստանը, Բելառուսը, Ղազախստանը, Ղրղզստանն ու Տաջիկստանը։ Պայմանագիրը ենթադրում է ռազմական համատեղ աջակցության ցուցաբերում՝ անդամ երկրներից որևէ մեկի՝ հարձակման ենթարկվելու դեպքում։