Նոյեմբերի 11-ին ՀՀ պաշտպանության նախարար Սեյրան Օհանյանը Մոսկվայում մասնակցել է ԱՊՀ մասնակից պետությունների պաշտպանության նախարարների խորհրդի (ՊՆԽ) հերթական նիստին, որի ընթացքում, օրակարգի համաձայն, դիտարկվել են 20-ից ավելի հարցեր, հայտնում է ՀՀ ՊՆ կայքը:
ԱՊՀ պաշտպանության նախարարների խորհրդի նիստ, 11 նոյեմբերի 2014թ
Մասնակից երկրների պաշտպանության նախարարների հավանությանն են արժանացել խորհրդի աշխատանքային մարմինների ընթացիկ տարվա գործունեության արդյունքները, հաստատվել է ԱՊՀ ՊՆԽ 2015թ աշխատանքային պլանը: Նիստի ընթացքում ընդունվել են հստակ որոշումներ` ԱՊՀ մասնակից պետությունների պաշտպանական գերատեսչությունների միջև բազմակողմ համատեղ գործունեության հետագա ակտիվացման ուղղությամբ:
Նույն օրը ՀՀ պաշտպանության նախարար Սեյրան Օհանյանը հանդիպումներ է ունեցել Ռուսաստանի Դաշնության պաշտպանության նախարար, բանակի գեներալ Սերգեյ Շոյգուի և Ղազախստանի Հանրապետության պաշտպանության նախարար Իմանգալի Թասմագամբեթովի հետ:
Երկկողմ հանդիպումների ընթացքում քննարկվել են պաշտպանական բնագավառում հայ-ռուսական և հայ-ղազախական համագործակցության ընթացիկ խնդիրներն ու հետագա զարգացման ուղիները, ձեռք են բերվել մի շարք պայմանավորվածություններ:
ՀՀ պաշտպանության նախարար Սեյրան Օհանյանը և Ռուսաստանի Դաշնության պաշտպանության նախարար, բանակի գեներալ Սերգեյ Շոյգուն հաստատել են նաև ՀՀ և ՌԴ պաշտպանության նախարարությունների միջև երկկողմ համագործակցության 2015թ ծրագիրը:
Ռուսաստանյան ՌԻԱ Նովոստի լրատվական գործակալության տեղեկատվության համաձայն՝ Օհանյան-Շոյգու հանդիպման ընթացքում քննարկվել են նաև միջազգային անվտանգության, երկկողմ ռազմական և ռազմատեխնիկական համագործակցության առաջնահերթություններին վերաբերող հարցեր:
Մասնավորապես, նախարարներն ամփոփել են ընթացիկ տարվա համատեղ միջոցառումների, օպերատիվ մարտավարական պատրաստությանը վերաբերող հարցեր։ Սեյրան Օհանյանն ու Սերգեյ Շոյգուն քննարկել են նաև ՀԱՊԿ-ի շրջանակներում Ղրղզստանում անցկացված «Անխախտ եղբայրություն-2014» և Ղազախստանում իրականացված «Փոխգործակցություն-2014» զորավարժություններին հայկական և ռուսաստանյան ստորաբաժանումների մասնակցությունը:
Հանդիպման ժամանակ հատուկ ուշադրություն է դարձվել նաև ՀՀ ԶՈւ կադրերի վերապատրաստմանը ռուսաստանյան ռազմական ուսումնական հաստատություններում (ներկայում ՌԴ-ում սովորում է ՀՀ ԶՈւ 244 զինծառայող)։
Հանդիպման ընթացքում նախարարները հաստատել են նաև 2015թ մայիսի 9-ին Երևանում կայանալիք զորահանդեսին ռուսաստանյան 102-րդ ռազմաբազայի ստորաբաժանումների մասնակցությունը:
Ավելացնենք, որ ԱՊՀ երկրների պաշտպանության նախարարների խորհուրդը ստեղծվել է 1992-ին։ Դրա կազմի մեջ մտնում են Հայաստանի, Ադրբեջանի, Ռուսաստանի, Բելառուսի, Ղազախստանի, Ղրղզստանի, Տաջիկստանի և Ուզբեկստանի ներկայացուցիչները։ Խորհրդի գլխավոր նպատակներից է անդամ երկրների միջև ռազմական համագործակցության կոորդինացումն ու բանակաշինության ոլորտում փորձի փոխանակման կազմակերպումը:
Ավելացնենք, որ Հայաստանը ԱՊՀ շրջանակներում մասնակցում է նաև ԱՊՀ ՀՕՊ միացյալ համակարգի ստեղծմանն ու կայացմանը: Ներկայում Ռուսաստանի հետ երկկողմ պայմանագրերով տարածաշրջանային միասնական ՀՕՊ համակարգեր են ստեղծում ինչպես Հայաստանը (Կովկասի տարածաշրջան), այնպես էլ Բելառուսն ու Ղազախստանը: