Վրաստանի ամենախոշոր «Վազիանի» զորավարժարանում նոյեմբերի 5-ին մեկնարկել է մեխանիզացված վաշտի ներգրավմամբ «Խերթվիսի-2014» (ամրոց) զորավարժությունը, հայտնում է Վրաստանի պաշտպանության նախարարության կայքը։
Վրաստանի մարտավարական զորավարժությունից
Նկարը՝ Վրաստանի ՊՆ-ի
Մարտավարական զորավարժությունը ղեկավարել է Շոթա Խուրցիձեի անվան ռազմական կրթության և վարժանքների ղեկավարման զրահատանկային ուսումնական կենտրոնի հրամանատար, գնդապետ Լերի Գելխաուրին։
Գնդապետը հրավիրված անձանց նախ ներկայացրել է զորավարժության նպատակն ու ներկայացրել պայմանական հակառակորդի գործողությունների բնույթը։
Վրաստանի մարտավարական զորավարժությունից
Նկարը՝ Վրաստանի ՊՆ-ի
Զորավարժության հիմնական նպատակն է եղել չեզոքացնել թշնամու ուժն ու վերահսկողություն հաստատել բնակելի հատվածի վրա։ Վարժանքների ընթացքում օգտագործվել է իմիտացիոն մարտի «MILES» լազերային համակարգ։
Ցուցադրական վարժանքներին ներկա են եղել Վրաստանի զինված ուժերի գլխավոր շտաբի պետի առաջին տեղակալ, բրիգադի գեներալ Վլադիմիր Չաչիբաիան, ցամաքային ուժերի Արևելյան հրամանատարության պետ, գնդապետ Ալեքսանդր Կիկնաձեն և բարձրաստիճան այլ զինվորականներ։