Ադրբեջանում 2014-ի հոկտեմբերի 30-ին ավարտվել է այդ երկրում տարեկան չորս անգամ անցկացվող զորակոչերից վերջինը, որին հաջոդրել են երկրի ուժային կառույցների մի շարք զորամասերում նորակոչիկների երդմնակալության արարողություններն ու հանդիսավոր այլ միջոցառումները։
Երդմնակալություն՝ սահմանապահ ծառայության Ջալիլաբադի շրջանի զորամասերից մեկում
Ինչպես նշվում է գերատեսչության կայքում, նոյեմբերի 2-ին սահմանապահ պետական ծառայության Ջալիլաբադի շրջանի Գյոյթեփե քաղաքում տեղակայված զորամասերից մեկում կայացել է նորակոչիկների երդմնակալության արարողությունը, որին ներկա է եղել նաև ծառայության պետի՝ անձնակազմի հետ տարվող աշխատանքների գծով տեղակալ, գեներալ-մայոր Ազադ Էլեգբերովը։
Արարողության ժամանակ զորամասի հրամանատար, գնդապետ Մեհման Յուսիֆովը ընթերցել է նաև սահմանապահ ծառայության պետ, գեներալ-գնդապետ Էլչին Գուլիևի շնորհավորական ուղերձը, որին հաջորդել է արդեն բուն երդմնակալության արարողությունը։
Նշենք, որ Ադրբեջանի սահմանապահ պետական ծառայությունը բաղկացած է սահմանապահ 9 ջոկատներից, որոնցից յուրաքանչյուրն, իր հերթին, սահմանապահ ուղեկալներից։ Դրան տեղակայված են Իրանի, Վրաստանի և Ռուսաստանի սահմանամերձ շրջաններում, ինչպես նաև Կասպից ծովի առափնյա գոտում։ Ջալիլաբադի շրջանում տեղակայված ուղեկալներն իրականացնում են Իրանի հետ պետական սահմանի պահպանությունը։
Հավելենք, որ Ադրբեջանի սահմանապահ պետական ծառայության անձնակազմը համալրվում է զորակոչային հիմունքով։ Զորատեսակը 2002 թվականի հուլիսին երկրի նախագահի հրամանով դուրս բերվեց ազգային անվտանգության նախարարության կազմից (սահմանապահ զորքերի վարչություն) և դարձավ ուժային առանձին կառույց, որը ենթարկվում է անմիջապես երկրի ղեկավարին։