Թուրքիան միջանցք է բացել՝ քրդերի լրացուցիչ ուժերին սիրիական Քոբանի քաղաք մտնելու և ԻՊ դեմ կռվելու հնարավորություն տալու համար։ • Թուրքիան շարունակում է տանկային ուժեր պահել Քոբանիի։ • Աշխատանքային այցով Նախիջևանում էր զինված ուժերի 9-րդ բանակային կորպուսի հրամանատարը։ • Ստամբուլում մեկնարկել է ՆԱՏՕ REGEX-14 հրամանատարական զորավարժությունը։ • Վրաստանում էր Թուրքիայի զինվորական պատվիրակությունը՝ ԶՈւ գլխավոր շտաբի պետի գլխավորությամբ։
• Հոկտեմբերի 20-ին հայտնի դարձավ, որ Թուրքիան՝ արևմտյան երկրների շուրջ մեկ ամիս տևած կոչերից հետո որոշեց միջանցք բացել Սիրիայի հետ սահմանին, որով Իրաքի Քրդստանի Փեշմերգե զորաջոկատներին հնարավորություն տվեց անցնել Քոբանի և միանալ այնտեղ իսլամիստների դեմ կռվող քրդերին։ Հարկ է նշել, սակայն, որ Թուրքիան դրեց պայման՝ միջանցքով չպետք է փոխադրվի զինամթերք։ Սպառազինության մատակարարման հարցն իր վրա վերցրեց ԱՄՆ-ն՝ օդային ճանապարհով դեսանտ իջեցնելով զենք և զինամթերք, որի զգալի մասը, սակայն, բաժին հասավ հենց իսլամիստներին։
• Հոկտեմբերի 23-ին պաշտոնական այցով Վրաստան ժամանեց Թուրքիայի ԶՈւ գլխավոր շտաբի պետ, բանակի գեներալ Նեջդեթ Օզելը։ Թբիլիսիում նրան ընդունել է պաշտպանության նախարար Իրակլի Ալասանիան, ով շնորհակալություն է հայտնել Թուրքիային՝ ռազմական և ռազմաքաղաքական մի շարք հարցերում Վրաստանին մշտապես աջակցելու համար։ Կողմերը խոսել են նաև Վրաստան-Թուրքիա-Ադրբեջան ձևաչափով ռազմական համագործակցության մասին և նշել, որ այդ երկրներն իրար կապող ենթակառուցվածքի պաշտպանության սցենարով առաջիկայում նախատեսվում է անցկացնել համատեղ զորավարժություն։
• Հոկտեմբերի 21-ին թուրքական բանակի 9-րդ կորպուսի հրամանատար, գեներալ-գնդապետ Շարաֆ Օնգայը ժամանեց Նախիջևան, որտեղ այցելեց ինքնավար հանրապետության առանձին համազորային բանակի զորամասեր, ինչպես նաև հետևեց զորամիավորման դաշտային վարժանքներին։ Այցին ավելի մանրամասն անդրադարձը՝ Ադրբեջանի ռազմաշաբաթում։
• Հակտեմբերի 24-ին «Անադոլու» գործակալությունն անդրադարձավ թուրքական զինուժի՝ թուրք-սիրիական սահմանի կուտակումներին։ Հրապարակված լուսանկարներում երևում են, որ այստեղ շարուանկում են կենտրոնացված մնալ տանկային ստորաբաժանումները։ Թուրքիայի նման քայլի հնարավոր շարժառիթների մասին կարող եք կարդալ այստեղ։
• Հոկտեմբերի 20-ին Թուրքիայի Ստամբուլ քաղաքում մեկնարկել է ՆԱՏՕ-ի շրջանակներում անցկացվող REGEX-14 հրամանատարական քառօրյա զորավարժությունը, որին մասնակցում են նաև զինվորականներ Ադրբեջանից, ինչպես նաև տասնյակ այլ երկրներից։
Զորավարժության հիմնական նպատակն է ամրապնդել փոխգործակցությունը մասնակից երկրների միջև և դրանց՝ տարբեր ստանդարտներ ունեցող զինված ուժերը հնարավորինս մոտեցնել ՆԱՏՕ-ի չափանիշներին։ Քառօրյա զորավարժությանը մասնակցում են Թուրքիայի զինված ուժերի 84 և հյուրընկալվող երկրների 48 զինվորականներ։
Ռազմաշաբաթը նաև`
Pingback: Ռազմաշաբաթ. Հայաստան. հոկտեմբերի 19-25 | Ռազմ.info
Pingback: Ռազմաշաբաթ․ Ադրբեջան․ հոկտեմբեր 19-25 | Ռազմ.info