Ռուսաստանյան ՌԴ-171Մ հրթիռային շարժիչներ արտադրող «Ռոսկոսմոս» ընկերությունը հրաժարվում է շարժիչը ուկրաինական «Յուժմաշ» ընկերությանը տրամադրել անվարձահատույց, ինչին ուկրաինացիները փորձում էին հասնել երկար բանակցությունների ընթացքում: Այս մասին տեղեկացնում է ռուսաստանյան «Իզվեստիա» կայքը:
Ուկրաինայում արտադրվող «Զենիթ» կրող հրթիռ
Խնդիրն այն է, որ Ռուսաստանում արտադրված, արդեն պատրաստ շարժիչը նախատեսված էր ուկրաինական «Զենիթ» կրող հրթիռի համար, որը պիտի Երկրի գեոստացիոնար ուղեծիր բարձրացներ արբանյակային հեռարձակման համար նախատեսված «Լիբիդ» արբանյակը:
Սակայն ռուսաստանյան ընկերությունը հրաժարվում է տրամադրել արբանյակը, քանի դեռ ուկրաինացիները չեն վճարել դրա համար: Շարժիչի գինը մոտավոր 13,5 մլն ամերիկյան դոլար է, ու քիչ հավանական է, որ ուկրաինական ընկերությունը պատրաստ է այս գումարով գնել շարժիչը, քանի որ ընկերությունն ինքն էլ խոստովանել է՝ ֆինանսական խիստ ծանր դրության մեջ է:
«Յուժմաշի»՝ ծանր վիճակի մեջ ընկնելու պատճառն այն է, որ Ռուսաստանում ներկայում հրաժարվում են գնել ընկերության արտադրած «Զենիթ» հրթիռները, կիսատ են թողել այլ ծրագրեր և այլն: Արդյունքում ուկրաինական ընկերությունը չի կարողանում վաճառել դրանք, քանի որ «Զենիթները» ուրիշ ոչ ոքի պետք չեն:
«Ռոսկոսմոսում» նույնպես հասկանում են, որ ուկրաինական «Յուժմաշը» կարող է սննկանալ ու նաև այդ պատճառով է, որ չեն համաձայնում տրամադրել շարժիչը՝ գումարը հետո ստանալու պայմանով:
Եթե ռուսաստանյան կողմը չտրամադրի շարժիչը, ուկրաինացիները չեն կարողանա այլ տեղից գնել այն: Ու ստացվում է, որ արբանյակն ու այն կրող «Զենիթ» հրթիռը, որոնց պատրաստման վրա արդեն ծախսվել է մոտ 250 մլն դոլար, կմնան «օդից կախված»: