Թուրքիայի վարչապետ Ահմեթ Դավութօղլուն հայտարարել է, որ 2011-ից գործող «գումար՝ զինվորական ծառայության փոխարեն» համակարգը երկրում չեղյալ կհամարվի։ Վերջին շրջանում այս հարցը Թուրքիայում դարձել էր լայն քննարկումների առիթ, և շատերը հակված էին կարծելու, որ ժամկետային զինծառայության փոխարեն գումար վճարելու հնարավորությունը կշարունակի լինել հասանելի, սակայն այս հարցին, թուրքական մամուլի բնորոշմամբ՝ «վերջակետ դրեց» վարչապետ Դավութօղլուն։
Ինչպես հայտնում է թուրքական «Միլլիյեթ» թերթը, Ահմեթ Դավութօղլուն նշել է, թե արդար չէ երկրի բնակչությանը տարանջատել ըստ եկամտի չափի և դրանով պայմանավորել՝ կմեկնի՞ քաղաքացին զինվորական ծառայության, թե՞ ոչ։
Նշենք, որ սույն հնարավորությունն ընձեռող օրինագիծը Թուրքիայում ընդունվել է 2011-ին։ Այն թույլ է տալիս արտերկրում ուսանող կամ աշխատող քաղաքացիներին ազատվել ժամկետային զինվորական ծառայությունից՝ վճարելով 30 000 թուրքական լիրա (շուրջ 13 200 ամերիկյան դոլար)։
Հավելենք, որ Թուրքիայիում գործում է զինված ուժերի՝ զորակոչային եղանակով համալրման համակարգը։ Զորակոչման են ենթակա 20 տարին լրացած արական սեռի բոլոր այն քաղաքացիները, ում նկատմամբ չեն գործում օրենքով սահմանված սահմանափակումներ (առողջական խնդիրներ, սոցիալական հատուկ կարգավիճակ և այլն)։ Համաձայն երկրի օրենսդրությանը, պատերազմի ժամանակ զորահավաքի են ենթակա 16-ից 60 տարեկան տղամարդիկ և 20-ից 46 տարեկան կանայք։
Հիշեցնենք, որ 2013-ի հոկտեմբերին երկրի խորհրդարանը փոփոխություններ մտցրեց «Զինապարտության» մասին օրենքում, որով նվազեցրեց ժամկետային ծառայության տևողությունը՝ 15 ամսից այն դարձնելով 12։
Հավելենք նաև, որ Թուրքիայի զինված ուժերի գլխավոր շտաբի հրապարակած տվյալների համաձայն, 2014-ի հոկտեմբերի 1-ի դրությամբ բանակում ծառայում է 400 307 ժամկետային զինծառայող։ Բացակայում է, սակայն, ստույգ վիճակագրությունը, թե տարեկան քանի քաղաքացի է օգտվել գումարի դիմաց զինվորական ծառայությունից ազատվելու հնարավորությունից։
Pingback: Թուրքիայում 2015-ի հունվարից կգործի «գումար ծառայության փոխարեն» ծրագիրը | Ռազմ.info