Սեպտեմբերի 29-ին ՀՀ պաշտպանության նախարար Սեյրան Օհանյանը հանդիպել է Հայ սև գոտիների միության միջազգային ակադեմիայի պատվիրակության հետ:
Հայ սև գոտիների միության ղեկավար Կարո Քեբաբջյանը Սեյրան Օհանյանին է հանձնում միության հուշամեդալը
Պաշտպանական գերատեսչության ղեկավարն իր երախտագիտությունն է հայտնել միջազգային ակադեմիայի նախագահ, Հայ սև գոտիների միության հիմնադիր, Մերձավոր Արևելքում Արցախի ներկայացուցիչ Կարո Քեբաբջյանին սահմանամերձ գոտիներում բնակվող երիտասարդների խնդիրները մշտապես ուշադրության կենտրոնում պահելու, առողջ, մարտունակ, ֆիզիկապես պատրաստված սերունդ դաստիարակելուն նպաստելու համար: Դրա վառ ապացույցն են սահմանամերձ գոտիներում բացված Հայ սև գոտիների միության միջազգային ակադեմիայի մասնաճյուղերը, որտեղ հայ երիտասարդները հնարավորություն ունեն անվճար հիմունքներով յուրացնել արևելյան մարզաձևի գաղտնիքները:
Ի նշան բարեկամության և փոխհամագործակցության` Կարո Քեբաբջյանը Պաշտպանական գերատեսչության ղեկավար Սեյրան Օհանյանին է հանձնել Հայ սև գոտիների միության հուշամեդալը, հայտնում է ՀՀ ՊՆ կայքը:
Ավելացնենք, որ 1974-ին ստեղծված կազմակերպությունը մի շարք ծրագրեր է իրականացրել Սփյուռքի հայկական համայնքներում՝ մասնավորապես ուշու և կունգ-ֆու մարզաձևերի խմբեր ստեղծելով հայ պատանիների համար: Այն իր մասնաճյուղերն ունի Կանադայում, Լիբանանում, Կիպրոսում, Սիրիայում ու Հայաստանում: