Ադրբեջանի նախագահ Իլհամ Ալիևն այսօր՝ սեպտեմբերի 24-ին, հրամանագիր է ստորագրել «Հայաստանի Հանրապետության և Ադրբեջանի Հանրապետության զորքերի շփման գծում անվտանգության մի շարք կանոնների վերաբերյալ»։
Այս մասին հաղորդում է Ադրբեջանի նախագահի պաշտոնական կայքը՝ հավելելով, որ Իլհամ Ալիևը սույն հրամանագրի առնչությամբ արդեն համապատասխան հանձնարարականներ է տվել կառավարությանը, նախագահի աշխատակազմին, պաշտպանության նախարարությանն ու Մամուլի խորհրդին։
Ըստ հրամանագրի՝ առաջնագծում անվտանգության կանոնների խստացման, զանգվածային լրատվամիջոցներում ու համացանցային ռեսուրսներում ռազմական, ռազմավարական նշանակության օբյեկտների, ԶՈւ ստորաբաժանումների, զորամասերի ստույգ տեղակայման, զորամասերում անձնակազմի թվաքանակի վերաբերյալ տեղեկությունների արտահոսքից խուսափելու, սահմանամերձ շրջաններում բնակվող քաղաքացիների պաշտպանվածության աստիճանը բարձրացնելու համար հանձնարարվել է միջոցներ ձեռնարկել տեղի բնակիչներից կամավոր պարեկային ջոկատներ ստեղծելու ուղղությամբ։
Ըստ աղբյուրի՝ կառավարությունը պարտավորվում է մեկ ամիս ժամկետում նախագահին ներկայացնել պետական գաղտնիք որակվող տեղեկությունների տարածման համար պատասխանատվության ավելացմանը վերաբերող առաջարկներ, ինչպես նաև համաձայնեցնել և հաստատել ՊՆ-ի հետ լրագրողների հավատագրման և նրանց՝ առաջնագիծ գործուղման կանոնները։ Նախագահի աշխատակազմը պարտավորվում է սահմանամերձ շրջանների բնակիչների հետ բացատրական աշխատանքներ կազմակերպել, որոնք միտված են լինելու ռազմական ու պետական կարևորության գաղտնիքների, Ադրբեջանի ազգային անվտանգությանը վնաս հասցնող տեղեկությունների չտարածման կոչերին, բացի այդ տեղական ինքնակառավարման մարմինների մամուլի ծառայությունների աշխատակիցների համար կազմակերպել դասընթացներ համացանցային ռեսուրսների ու սոցցանցերի ճիշտ օգտագործման և գաղտնի տեղեկությունների հրապարակումից խուսափելու շրջանակներում։ Ինչ վերաբերում է Ադրբեջանի ՊՆ-ին, ապա վերջինս պարտավորվում է սեփական մամուլի ծառայության օպերատիվության աստիճանը բարձրացնել, առավելապես առաջնագծից տեղեկությունների հաղորդման ուղղությամբ, կազմակերպել զանգվածային լրատվամիջոցների և սոցցանցային ռեսուրսների մշտադիտարկում։ Ապա այս ամենի արդյունքում հանցավոր անձանց, մեղավորների կամ կասկածյալների երևան հանելու դեպքում նպաստել օրենքի սահմաններում նրանց պատասխանատվության ենթարկելուն։ Մամուլի խորհրդին էլ հանձնարարվել է Ադրբեջանի զանգվածային լրատվամիջոցների և բնակչության շրջանում քարոզչական-տեղեկատվական աշխատանք տանել, որպեսզի նրանք սոցցանցերում և մամուլում չտարածեն Ադրբեջանի ազգային անվտանգությանը վնասող տեղեկություններ։
Այսպիսով, հրամանագրի տեքստից պարզ է դառնում, որ դրանով Ադրբեջանի իշխանությունները փորձում են լուծել գերազանցապես լրագրողների և սոցցանցերում ակտիվ օգտատերերի հետ կապված խնդիրները։ Դրանք առավել ակնառու էին, երբ 2014-ի օգոստոսի սկզբին առաջնագծում լարվածության ժամանակ Ադրբեջանի պաշտպանական գերատեսչության մամուլի ծառայությունը հաճախ չէր մեկնաբանում զոհերի ու վիրավորների մասին տեղեկությունները. արդյունքում սկզբնաղբյուր էին դառնում այս կամ այն լրատվամիջոցի «սեփական աղբյուրները» կամ էլ որոշ օգտատերերի սոցցանցային գրառումները, որոնք երբեմն միմյանցից տարբեր տվյալներ էին փոխանցում։
Pingback: Ադրբեջանում ԶՈւ բարոյահոգեբանական մթնոլորտի բարելավման թեմայով գիտաժողով է անցկացվել | Ռազմ.info
Pingback: Ադրբեջանում տեղեկատվական անվտանգության շուրջ բանակցում են խորհրդարանն ու պաշտպանության նախարարը | Ռազմ.info
Pingback: Ադրբեջանում տեղեկատվական անվտանգության շուրջ բանակցում են խորհրդարանն ու պաշտպանության նախարարը | Ռազմ.info
Pingback: Ադրբեջանի ՊՆ-ն հրապարակել է «Տեղեկատվական և ֆիզիկական անվտանգության» ուղեցույցեր | Ռազմ.info
Pingback: Ադրբեջանում վթարի հետևանքով զինծառայողներ են մահացել | Ռազմ.info
Pingback: Ադրբեջանի պաշտպանական ու անվտանգության համակարգերի կորուստները 2014-ին. Ռազմինֆո | Ռազմ.info