Եմենում ներքաղաքական ճգնաժամը հաղթահարելու նպատակով երկրի ներկայիս կառավարությունը և շիադավան հութի զինյալները համաձայնություն են ստորագրել, ըստ որի՝ 3 օրվա ընթացքում զինյալները նոր վարչապետի թեկնածուներ են առաջադրելու։
Հութի զինյալներ՝ Սանայում
Ինչպես հաղորդում է BBC լրատվական գործակալությունը, ավելի վաղ՝ սեպտեմբերի 18-ից մինչև 21-ն ընկած ժամանակահատվածում, Եմենում արյունալի բախումներ էին գրանցվել հութիների և ուժայինների միջև։ Զինյալներին հաջողվել էր շրջափակել վարչական նշանակության մի քանի շենքեր մայրաքաղաք Սանայում, ինչպես նաև հիվանդանոցներ, հեռուստակենտրոնը, բնակելի մի շարք թաղամասեր։ Զինյալները կիրառել էին իրենց ունեցած հրետանային համակարգերը, ծանր զրահատեխնիկան, ականանետեր։
Բախումների զոհ էին գնացել 120 հոգի, վիրավորների թիվն անցնում է մի քանի հարյուրից։ Սեպտեմբերի 21-ին Եմենի կենտրոնական իշխանությունները ստիպված էին 3 բնակելի թաղամասերում պարեկային ժամ հայտարարել։
Նկատենք, որ հութիների խմբավորումն առավել հայտնի է «Ալ Հուսի» անունով, հիմնականում գործում է երկրի հյուսիսային և հյուսիսարևմտյան հատվածներում, որոնք սահմանակից են Սաուդյան Արաբիային։ Նրանց նպատակն է Եմենի տարածքում զեիդական իմամության ստեղծումը։ Նշենք, որ հութիների ազդեցությունը վերոհիշյալ տարածքներում էլ ավելի ընդլայնվեց 2012-ին Եմենի նախագահ ալ-Սալեհի հրաժարականից հետո։
2014-ի հունվարի տվյալներով՝ հութիների քանակը հասնում է 120 հազարի։ Նրանց հիմնական կայանատեղին Սաադա լեռնային գավառն է, որտեղ էլ քարոզչություն են տանում երիտասարդների շրջանում։ Ընդ որում, նրանց հետևորդների շարքում են նաև մայրաքաղաք Սանայի շիա բնակչության մեծ մասը։
Եմենի կառավարությունը, բարեկամական հարաբերություններ ունենալով Սաուդյան Արաբիայի և ԱՄՆ-ի հետ, մինչ օրս պնդում է, որ հութիներն Իրանի լրտեսներն են։ Պաշտոնական Թեհրանը բազմիցս հերքել է նման լուրերը։
Հավելենք, որ 2004-2010 թթ. Եմենի կառավարական զորքերը մի քանի անգամ հուժկու բախումներ են ունեցել հութիների հետ, ապա 2010-ին կնքել են զինադադարի պայմանագիր։ Սակայն 2011-ի վերջին այսպես կոչված «Արաբական գարնան» մթնոլորտում նոր մարտեր սկսվեցին հութիների և «ալ Կաիդայի» համախոհներ համարվող սալաֆիականների միջև։ 2013-ին հութիները համաձայնություն են տվել մասնակցելու Եմենի կառավարության կազմակերպած «հաշտեցման երկխոսությանը»՝ հավաստիացնելով, որ իրենք չունեն անջատողական նպատակներ, պարզապես ցանկանում են, որպեսզի «Սանան ճանաչի ու հարգի իրենց իրավունքները»։ Այնուամենայնիվ, 2014-ի հունվարից սկսած հութիների հետ բախումները վերսկսվել էին։