ՀՀ զինված ուժերի կապի զորամասերից մեկում սեպտեմբերի 14-ը տոնական օր էր: Զորամասում նշվում էր ՀՀ ԶՈւ կապի զորքերի կազմավորման օրը, ինչի կապակցությամբ էլ զորամասում տոնական միջոցառում էր կազմակերպվել:
Միջոցառմանը մասնակցելու ու կապավորներին շնորհավորելու էին եկել Երևանի պետական համալսարանի «Վարդանանք» ռազմահայրենասիրական դաստիարակության ակումբի սաները, ազգագրական պարերի «Պարենք հայերեն» նախաձեռնությունը, երգիչներ, ծառայողների հարազատներն ու հյուրեր:
Դամիթ Ամալյանի ու մյուս երգիչների կատարումների ներքո զինծառայողները շուրջպար էին բռնում «Պարենք հայերենի» սաների հետ, ովքեր զինծառայողներին նաև սովորեցնում էին հայկական ազգագրական պարերը:
Կապի զորքերի նշանակության մասին խոսելով՝ կապի ուսումնական զորամասի հրամանատարի ԱՀՏԱ գծով տեղակալ, մայոր Համբարձումյանը նշեց, որ կապի զորքերը կարևոր օղակ են Հայաստանի զինված ուժերում, չկա մի զորամաս, որտեղ կապավորներ չլինեն: Սովորական պայմաններում նրանց դերը չի երևում, բայց եթե կապը չգործի, տեղը միանգամից կերևա:
Մայոր Համբարձումյանը նշեց նաև, որ իրենց զորամասի յուրահատկություններից մեկն այն է, որ իրենց մոտ մեծ թիվ են կազմում բուհեր ավարտած ժամկետային զինծառայողները, ինչը միաժամանակ և՛ դրական է ներազդում զորամասի վրա, և՛ նաև դժվարություններ է ստեղծում, որովհետև կայացած երիտասարդների հարմարումը սովորաբար ավելի դանդաղ է ընթանում:
Հանդիսավոր միջոցառումից հետո զինծառայողներին ու հյուրերին սպասում էր տոնական ճաշը, որը պատրաստել էին արդեն երկրորդ տարին զինված ուժերում լավագույններից մեկը ճանաչվող ճաշարանի խոհարարները:
Ճաշարանի պետ, ենթասպա Համբարձումյանը Ռազմինֆոյին պատմեց, որ լավագույն ճաշարաններից մեկը ճանաչվելու գործընթացը շատ աշխատանք, ջանք ու եռանդ է պահանջել: Ենթասպա Համբարձումյանը նշեց, որ լավագույններից մեկը ճանաչվելու գործում դեր է խաղացել նաև այն, որ զորամասի խոհարարները զինծառայողների համար սնունդը պատրաստում էին այնպես, ինչպես իրենց երեխաների համար: Հենց այդ պատճառով է, որ զորամասի ճաշարանում հաճախակի հարիսա են տալիս, քանի որ հաշվի են առնում, թե զինվորներին որ ճաշերն են դուր գալիս:
Տոնական օրվա ավարտին զորամասի հրամանատարությունը արձակումներ տրամադրեց զորամասի ժամկետայինների մի մասին, որպեսզի իրենց տոնական տրամադրությունը կիսեն նաև հարազատների հետ: