Ադրբեջանի պաշտպանության նախարար, գեներալ-գնդապետ Զաքիր Հասանովն ընդունել է Բաքու ժամանած Իսրայելի պաշտպանության նախարար Մոշե Յալոնի գլխավորած պատվիրակությանը։
Զաքիր Հասանովը հանդիպել է Իսրայելի իր պաշտոնակցին
Այս մասին տեղեկացնում է Ադրբեջանի պաշտպանության նախարարության մամուլի ծառայությունը։ Ըստ աղբյուրի՝ հանդիպման ընթացքում քննարկվել են երկու երկրների պաշտպանական գերատեսչությունների ակտիվ փոխգործակցության հեռանկարները։
Նշենք, որ այսօր՝ սեպտեմբերի 10-ին, Յալոնի գլխավորած պատվիրակությանն ընդունել էին նաև Ադրբեջանի նախագահ Իլհամ Ալիևը և արտգործնախարար Էլդար Մամեդյարովը։
Հիշեցնենք, որ Յալոնը ժամանել է Բաքու՝ մասնակցելու սեպտեմբերի 11-13-ն ընկած ժամանակահատվածում անցկացվող ADEX-2014 ռազմարդյունաբերական ցուցահանդեսին։
Հետևելով ցուցահանդեսի կայքին՝ նշենք, որ Իսրայելը ներկայանալու է 16 ընկերություններով՝ Elbit Systems, IMI, İAİ, IWI, Rafael, Aeronautics, Visionmap, ATL-Atlantic Technologies, Camero-Tech, DSIT, Fibrotex Tech, İspra LTD, Plasan, Meprolight, Ness Technologies։ Ադրբեջանը նշված իսրայելական ընկերություններից մի քանիսի հետ ակտիվորեն համագործակցում է։