Վարժանքներ ՌԴ զինված ուժերում՝ «Վերբա» նորագույն դյուրակիր համալիրի կիրառմամբ

ՌԴ ԶՈւ Արևելյան ռազմական օկրուգի մոտոհրաձգային ստորաբաժանումները Պրիմորյեում տեղակայված զորավարժարանում կիրառել են բոլորովին վերջերս սպառազինության ընդունված «Վերբա» դյուրակիր զենիթահրթիռային համալիրը։ Ինչպես հաղորդում է ռուսաստանյան «ԻՏԱՐ-ՏԱՍՍ» գործակալությունը, այս մասին հայտնել է ՌԴ ԶՈւ Արևելյան ռազմական օկրուգի մամուլի ծառայության պետ, գնդապետ Ալեքսանդր Գորդեևը։

«Վերբա» դյուրակիր ԶՀՀ

«Վերբա» դյուրակիր ԶՀՀ

Նա նշել է, որ զինծառայողները բավական արագ յուրացրել են «Վերբա» դյուրակիր ԶՀՀ-ի (ռուս.՝ ПЗРК Верба) արդյունավետ կիրառումը, քանի որ դրանք իրենց կառուցվածքով և աշխատանքի սկզբունքով բավական նման են մինչ այդ շահագործվող «Իգլա» համալիրներին։

Գորդեևը տեղեկացրել է նաև, որ վարժանքների ընթացքում հակաօդայինները «Վերբա» դյուրակիր ԶՀՀ-ի կիրառմամբ խոցել են անօդաչու թռչող սարքեր մարմնավորող պայմանական թիրախներ։ Ընդ որում, ստորաբաժանումների առջև եղել է առաջադրանք՝ միաժամանակ խոցել 10-ից 15 թիրախ, որոնք թռնում են համալիրի խոցման տիրույթի առավելագույն հեռավորության և բարձրության վրա։

Ռուսաստանյան նախագծման 9Կ333 «Վերբա» դյուրակիր ԶՀՀ-ն օդային թիրախները կարող է խոցել մինչև 4 500 մետր բարձրության և 500-ից 6 500 մետր հեռավորության վրա։ Համալիրն օժտված է ավտոմատացված նոր համակարգով, շնորհիվ որի մարդկային գործոնը հասցված է նվազագույնի։ Ներդրված է նաև համակարգ, որը բացառում է անզգուշության հետևանքով սեփական օդուժի թռչող սարքերի խոցումը։

Դյուրակիր այս ԶՀՀ-ի հրթիռն օժտված է նշանառման եռասպեկտր գլխիկով, ինչի արդյունքում էականորեն աճել է համալիրի արդյունավետությունը։ Համեմատության համար նշենք, որ լայն տարածում ունեցող «Իգլա» դյուրակիր ԶՀՀ-ի նորագույն «Ս» մոդֆիկացիայի հրթիռի գլխիկը երկսպեկտր է։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *