Այսօր՝ օգոստոսի 13-ին, Մերձմոսկովյան Ժուկովսկի քաղաքում մեկնարկել է «Օբորոնէքսպո-2014» սպառազինությունների և նորարարությունների միջազգային 2-րդ ցուցահանդեսը, որին մասնակցում է նաև Հայաստանը։
Այս մասին հայտնում է ռուսաստանյան «Ռիա Նովոստի» լրատվական գործակալությունը։
Հայաստանի մասնակցության մանրամասները չեն հաղորդվում, տեղեկություն չկա նաև ցուցահանդեսի պաշտոնական կայքում։
Ցուցահանդեսի կազմակերպիչներն են ՌԴ արդյունաբերության և առևտրի նախարարությունը, ռազմատեխնիկական համագործակցության Դաշնային ծառայությունը, ինչպես նաև «Ռոստեխ» պետական կորպորացիան։
Ցուցահանդեսի հիմնական նպատակը ռազմաարդյունաբերական համակարգի նորագույն մշակումների ցուցադրումն է։
Հայտնի է, որ ցուցադրվելու են հրթիռային և հրետանային սպառազինության ոլորտի մշակումներ, զրահամեքենաների և ռազմական ավտոմեքենաների օրինակներ, ինչպես նաև կապի և այլ ոլորտների միջոցներ։
Ցուցահանդեսին բացի Ռուսաստանից մասնակցում են նաև Ալժիրը, Բելառուսը, Գերմանիան, Հնդկաստանը, Չինաստանը, ԱՄՆ, Ֆրանսիան, Չեխիան և Շվեյցարիան։