Իրաքում գրանցված պայթյուններին զոհ է գնացել 19 մարդ

Իրաքի մայրաքաղաք Բաղդադում օրերս արձանագրված 2 պայթյունների հետևանքով մահացել է առնվազն 19 հոգի, տարբեր աստիճանի վնասվածքներ են ստացել 40-ը։
Այս մասին հաղորդում է «Ալ Ջազիրա» հեռուստաընկերությունը։ Ըստ աղբյուրի՝ ականապատ ավտոմեքենաներով մահապարտ ահաբեկիչները ներխուժել են Բաղդադի հարավային՝ Էզ-Զաաֆրանիա և կենտրոնական՝ Էլ-Քարրադա թաղամասեր։ Պայթյուններից րոպեներ անց Իրաքի ուժայինները շրջափակել են սույն թաղամասերը, տուժածներին տեղափոխել են մոտակա հիվանդանոցներ։ Այս պահի դրությամբ այլ մանրամասներ հայտնի չեն։ Դեռևս ոչ մի խմբավորում չի ստանձնել ահաբեկչությունների պատասխանատվությունը։
Հիշեցնենք, որ 2014-ի օգոստոսի 6-ին Իրաքի մայրաքաղաք Բաղդադում մի շարք ահաբեկչական գործողություններ էին իրականացվել, որոնց հետևանքով կար առնվազն 51 զոհ։ Ամենայն հավանականությամբ պայթյունների այս շարքը պատասխան գործողություն էր  «Իրաքի ու Լևանտի իսլամական պետություն» իսլամիստական խմբավորման շուրջ 60 զինյալների սպանությանը Մոսուլ քաղաքում։
Ներկայումս Իրաքում լարված ներքաղաքական իրավիճակ է։ Իրաքի զինված ուժերի և «Իրաքի և Լևանտի (Ասորիքի) իսլամական պետություն» իսլամիստական (սուննի ուղղության) կազմակերպության միջև մարտերը փոփոխակի հաջողությամբ շարունակվում են։
Սիրիայում հաջող գործողություններից հետո ԻԼԻՊ-ն այժմ էլ ակտիվացել է Իրաքում՝ գրավելով այդ երկրի երկրորդ խոշոր քաղաքը՝ Մոսուլն ու առաջանալով մայրաքաղաք Բաղդադի ուղղությամբ, որտեղ շիաները սկսել են պատրաստվել պաշտպանությանը։ Թեև իրաքյան զինուժը որոշակի հաջողություններ ունենում է, սակայն իսլամիստները նույնպես գրավում են նոր տարածքներ, ինչպես նաև կարողանում պահպանել արդեն գրաված տարածքները։