Ղրղզստանում մեկնարկել է ՀԱՊԿ «Անխախտ եղբայրություն-2014» զորավարժության եզրափակիչ փուլը (ֆոտո)

Ղրղզստանում շարունակվում է ՀԱՊԿ անդամ երկրների զորախմբերի մասնակցությամբ անցկացվող «Անխախտ եղբայրություն-2014» զորավարժությունը, որին մասնակցում են նաև Հայաստանի խաղաղապահ ուժերը։ Օգոստոսի 1-ին մեկնարկել է զորավարժության 3-րդ՝ եզրափակիչ փուլը, որի ընթացքում անդամ երկրների զինծառայողները համատեղ ուժերով կիրականացնեն հիմնականում խաղաղապահ գործողություններ։ Այս մասին հայտնում է ռուսաստանյան «Ռիա-Նովոստի» լրատվական գործակալությունը։

Միացյալ ուժերի զորախումբը զորավարժության ընթացքում

Ընդհանուր առմամբ, «Անխախտ եղբայրություն-2014» զորավարժությանը մասնակցում է շուրջ 700 զինծառայող՝ Հայաստանից, Ռուսաստանից, Բելառուսից, Ղազախստանից, Ղրղզստանից և Տաջիկստանից։ Ռուսաստանն ու Ղազախստանը ներկայացված են յուրաքանչյուրը երեքական գումարտակով, իսկ մյուս երկրները՝ մեկական։

Ղրղզստանի պաշտպանության նախարարությունից հայտնել են, որ զորավարժության այս փուլն իր մեջ ներառելու է այնպիսի առաջադրանքներ, ինչպիսիք են լեռնային տեղանքում մարդասիրական բեռների ուղեկցումը, պետական կարևորության օբյեկտների պահպանությունը, ինչպես նաև շարասյան վրա իրագործված հարձակման կասեցումը։ Վարժանքները ղեկավարելու է Ղրղզստանի պաշտպանության նախարարության մարտական պատրաստության վարչության պետ, գնդապետ Նուրբեկ Նիյազալիևը։

Հավելենք, որ Ղրղզստանի Ալա-Թոո զորավարժարանում հուլիսի 29-ին մեկնարկած քառօրյա զորավարժության նպատակը ՀԱՊԿ միացյալ ուժերի մարտունակության աստիճանի ստուգումն է, որին պետք է հաջորդեն համապատասխան քայլերը՝ այդ ցուցանիշն էլ ավելի բարձրացնելու ուղղությամբ։

Նշենք, որ «Անխախտ եղբայրություն» զորավարժությունն անցկացվում է երրորդ անգամ։ 2012-ին այն ընթացավ Ղազախստանում, իսկ 2011-ին՝ Ռուսաստանում։

ՀԱՊԿ-ն (Հավաքական անվտանգության պայմանագրի կազմակերպություն) ռազմաքաղաքական բլոկ է, որին անդամակցում են Հայաստանը, Ռուսաստանը, Բելառուսը, Ղազախստանը, Ղրղզստանն ու Տաջիկստանը։ Պայմանագիրը ենթադրում է ռազմական աջակցության ցուցաբերում՝ անդամ երկրներից որևէ մեկի հարձակման ենթարկվելու դեպքում։

Միացյալ ուժերի հրամանատարական կետը

Հայաստանյան զորախմբի ներկայացուցիչները խաղաղապահ ուժերի զրահատեխնիկայով

Հայաստանյան զորախմբի անդամները դեսանտավորման ժամանակ