[թարմացում] ՊԲ-ն հրապարակել է ադրբեջանական դիվերսիոն խմբի անդամի լուսանկարները

Պաշտպանության բանակի մամուլի ծառայությունը, հաշվի առնելով, որ ադրբեջանական կողմը հերքում է Քարվաճառում դիվերսիայի մասին վկայող իրեղեն ապացույցների իսկությունը, հրապարակել է դիվերսիոն հետախուզական խմբի գերեվարված անդամ Գուլիև Շահբազ Ջալալօղլուի լուսանկարը։ 

դիվերսիոն հետախուզական խմբի գերեվարված անդամ Գուլիև Շահբազ Ջալալօղլու

դիվերսիոն հետախուզական խմբի գերեվարված անդամ Գուլիև Շահբազ Ջալալօղլու

Հիշեցնենք, որ Պաշտպանության բանակի մամուլի ծառայությունը հրապարակել էր Քարվաճառում վնասազերծված դիվերսիոն խմբի անդամներին պատկանող լրակազմի և զինամթերքի լուսանկարներ։

Հավելենք, որ հուլիսի 10-ի առավոտյան հայտնի դարձավ, որ Քարվաճառի ուղղությամբ կանխվել է հակառակորդի հետախուզադիվերսիոն խմբի ներթափանցման փորձ: Խմբի մի մասը ձերբակալվել է, մյուսներին հաջողվել է դիմել փախուստի։

Գրանցված միջադեպի հետևանքով հայկական կողմը որևէ կորուստ չունի։

[թարմացում] — Ադրբեջանի պաշտպանության նախարարությունն արդեն իսկ արձագանքել է ՊԲ հրապարակմանը։ Համաձայն Ադրբեջանի ՊՆ պաշտոնական կայքում տեղ գտած հայտարարությունը՝ «հայկական լրատվամիջոցներում տարածված լուսանկարներում ներկայացված անձը չի ծառայում Ադրբեջանի Հանրապետության զինված ուժերում»։

[թարմացում] — Ադրբեջանական ԱՊԱ լրատվական գործակալությունը Քարվաճառում ձերբակալված դիվերսանտի ինքնությունն ու միջադեպի մանրամասները պարզելու նպատակով դիմել է Ադրբեջանի Գերիների, պատանդների ու անհետ կորածների հանձնաժողով, սակայն հանձնաժողովից լուրը չեն մեկնաբանել։

[թարմացում] — Ադրբեջանական Տերտերի (Թարթառի) շրջանի Ղափանլը գյուղի բնակիչ, 1968-ին ծնված Գուլիև Շահբազ Ջալալ օղլուի եղբայրը՝ Իլհամ Գուլիևը, հարցազրույց է տվել ադրբեջանական Teleqraf.com կայքին՝ շեշտելով, որ Շահբազը որոշ ժամանակ առաջ Քարվաճառ է ուղևորվել և այնտեղ տեսագրություններ կատարել։ Գուլիևի եղբայրը հավատիացրել է, որ չի իմացել, թե «Շահբազը գերի է ընկել»։ Եղբոր խոսքերով՝ իրենք բազմիցս հորդորել են, որ նա չգնա Քարվաճառ, քանի որ «վտանգի է ենթարկում իր կյանքը»։ Եղբայրը հավելել է՝ Շահբազն ունի կին և մեկ դուստր։ Ըստ Իլհամ Գուլիևի՝ հունիսի 18-ից ի վեր իրենք Շահբազին չեն տեսել։ «Նա սովորաբար միայնակ չէր գնում այնտեղ»,_հավելել է եղբայրը։

[թարմացում] — Ադրբեջանական ANSpress կայքը պնդում է, որ Գուլիևը ԿամԱԶ ավտոմեքենայի վարորդ է։