Հուլիսի 4-ին Սև ծովի՝ ՌԴ-ին պատկանող ջրային տարածքներում մեկնարկել էին ՌԴ Սևծովյան նավատորմի զորավարժությունները, որոնց ընթացքում արդեն հուլիսի 7-ին հարվածային նավախմբերին հաջողվել է խոցել պայմանական հակառակորդի ռազմանավերը։
Ինչպես ռուսաստանյան «Ռիա Նովոստի» լրատվական գործակալությանը հաղորդել են ՌԴ պաշտպանության նախարարությունից, զորավարժություններն ընթանում են Սևծովյան նավատորմի հրամանատար, ծովակալ Ալեքսանդր Վիտկոյի գլխավորությամբ։
Հետաքրքիր է այն հանգամանքը, որ միևնույն ժամանակ՝ հուլիսի 4-ից 13-ն ընկած ժամանակահատվածում, Սև ծովում ընթանում են միջազգային «Բրիզ-2014» ռազմածովային վարժանքները։ Դրանց մասնակցում են ԱՄՆ-ի, Թուրքիայի, Ռումինիայի, Բուլղարիայի, Հունաստանի ՌԾՈւ նավերը։ Ընդ որում, սույն վարժանքներին կիրառվում են ՆԱՏՕ-ի երկրորդ մշտական հակաականային խմբի 4 նավեր, ԱՄՆ պարեկային ինքնաթիռներ։ Նկատենք, որ ՌԴ-ում հայտնի ռազմական փորձագետ Իգոր Կորոտչենկոն ՆԱՏՕ-ի այս զորավարժություններն անվանել է «ՌԴ-ի դեմ ուղղված ռազմական շանտաժ»։
Վերադառնալով ռուսաստանյան սևծովյան վարժանքներին, նշենք, որ ըստ պաշտոնական տվյալների՝ «Շտիլ» փոքր հրթիռային նավը, 2 միավոր «Ռ-109» և «Ռ-239» հրթիռային կատերները հաջողությամբ համատեղ հրթիռային հարվածներ են հասցրել պայմանական թիրախներին։ Այս հարվածների ընթացքում օդային աջակցություն են ցուցաբերել Սևծովյան նավատորմին պատկանող Սու-24 ճակատային ռմբակոծիչները։ Ընդհանուր առմամբ, վարժանքների այս փուլին մասնակցել է 20 միավոր նավ ու կատեր, 20 ինքնաթիռ և ուղղաթիռ, որոնք պատկանում են ՌԴ ԶՈւ Հարավային ռազմական օկրուգին։