Ուկրաինայի հարավ-արևելքում հունիսի 20-ին հայտարարված հրադադարի ընթացքում շարունակվում են տեղային բախումներն ու հրադադարը խախտելու փոխադարձ մեղադրանքները։ Այսօր լրանում է հրադադարի համար նախատեսված ժամկետը, թեև գիշերը կրկին կողմերը մարտեր են վարել:
Ծավալվող իրադարձություններին օպերատիվ հետևելու համար Ռազմինֆոն առաջարկում է թարմացվող լրահոսը։
Ուկրաինական ուժայինները հակաահաբեկչական գործողության գոտում
19:20-Ռուսաստանի, Ֆրանսիայի և Գերմանիայի ղեկավարներ Վլադիմիր Պուտինը, Ֆրանսուա Օլանդն ու Անգելա Մերկելը կոնֆերանս զանգ են ունեցել Ուկրաինայի նախագահ Պյոտր Պորոշենկոյի հետ, որի ընթացքում ի թիվս այլ հարցերի քննարկման, կոչ են արել նաև կրկին երկարաձգել հրադադարի ժամկետները։
18:30-Ուկրաինայի ներքին գործերի նախարարի պաշտոնակատար Արսեն Ավակովն իր ֆեյսբուքյան էջի միջոցով հայտնել է, որ ազգային գվարդիայի կազմում ձևավորվել է նոր վարչություն, որը զբաղվելու է տեղեկատվական անվտանգության հարցերով։
17:25-Մարտի դաշտում Դոնեցկի ապստամբների գործողությունները համակարգող Իգոր Ստրելկովը հրապարակել է տեսահաշվետվություն, որում թվարկել է վերջին շրջանում որպես օգնություն ստացած կապի ու հատուկ այլ միջոցները։ Ցանկն ամբողջությամբ՝ տեսանյությում։
16:05-Ուկրաինայի ազգային անվտանգության և պաշտպանության խորհուրդը լրատվամիջոցներին հայտնել է, որ Դոնեցկի ու Լուգանսկի շրջանների մի քանի քաղաքում ապստամբները գրավել են ներքին գործերի նախարարության շրջանային բաժանմունքները, ինչպես նաև «Կիևսթար» բջջային օպերատորի տեխնիկական ապահովման կենտրոնը։
15:20-Կիևում անցկացվում է շուրջ 1 000 հոգանոց բողոքի ցույց, որի մասնակիցները հիմնականում «Դոնբաս» և «Ազով» գումարտակների մարտիկներն ու նրանց կողմնակիցներն են։ Նրանց հիմնական պահանջն է դադարեցնել հրադադարն ապստամբների հետ ու զենքով ապահովել բոլոր նրանց, ովքեր ցանկանում են կռվել հարավ-արևելյան անհնազանդ շրջաններում։
14:35-Ուկրաինայի արտակարգ իրավիճակների նախարարությունը հրապարակել է տվյալներ, համաձայն որոնց երկրի հարավ-արևելքում հակաահաբեկչական գործողության մեկնարկից ի վեր շրջանը լքել են ավելի քան 25 000 քաղաքացի։ Նրանցից շուրջ 3 000-ը երեխաներ են։
13:50-Ուժայինները վաղ առավոտից ականանետային կրակ են վարում Սլավյանսկի ուղղությամբ։ Արկերից մեկն ընկել է շուկայի հարևանությամբ, ինչի հետևանքով արդեն իսկ զոհվել է խաղաղ 2 բնակիչ։ Այս մասին սոցցանցերում գրել են քաղաքի բնակիչները։
13:25-Հարավ-արևելքում հակաահաբեկչական գործողության շտաբի մամուլի քարտուղարը լրատվամիջոցներին հայտնել է, որ անցնող օրերին Սլավյանսկի մատույցներում իրականացված գործողություննեի հետևանքով զոհվել է 5, վիրավորվել 17 ուժային։
12:50-Ուկրաինայի ազգային գվարդիայի մամուլի ծառայությունը տարածել է հաղորդագրություն, որում նշել է՝ կիրակի առավոտյան ապստամբները ականանետային կրակ են բացել Սլավյանսկի հարևանությամբ գտնվող Կարաչուն լեռան մատույցներում տեղակայված ուժայինների հենակետի ուղղությամբ։ Զոհեր կամ վիրավորներ չկան։