ՄԱԿ-ի սովորական սպառազինությունների ռեգիստրում 2013-ին արտահանած սպառազինության իր հաշվետվությունն է ներկայացրել նաև Թուրքիան։ Դրանում ի թիվ այլ երկրների, տեղ է գտել նաև Ադրբեջանը, որին Թուրքիան վաճառել է 3 միավոր 122 մմ-անոց համազարկային կրակի ռեակտիվ համակարգ (ՀԿՌՀ) և նույն տրամաչափի հրետանային 1000 արկ։
Սակարյա ՀԿՌՀ. Թուրքիայի ԶՈւ
Թեպետ հաշվետվությունում արտահանված սպառազինության ստույգ տեսակը նշված չէ, այդուհանդերձ, դատելով տրամաչափից, կարող ենք ենթադրել, որ խոսքը թուրքական Roketsan (Ռոքեթսան) ընկերության արտադրած Սակարյա ՀԿՌՀ-ի մասին է։
1997-ից թուրքական բանակում շահագործվող 5 հոգանոց անձնակազմ ունեցող Սակարյա ՀԿՌՀ-ն ունի մինչև 40 կմ հեռահարություն։ Թուրքիան այդ համակարգը, Ադրբեջանից բացի, արտահանում է նաև Սաուդյան Արաբիա։
Նշենք, որ տարբեր երկրների արտահանած կամ գնած սպառազինությունը ոչ միշտ է ամբողջական ծավալով տեղ գտնում ՄԱԿ-ի սովորական սպառազինությունների ռեգիստրում, ուստի պարտադիր չէ, որ Ադրբեջանին 2013-ին մատակարարված թուրքական սպառազինության ցանկը եզրափակվի այսքանով։
Հիշեցնենք նաև, որ 2014-ի հունիսի 10-ին ՄԱԿ-ի սովորական սպառազինությունների ռեգիստրում իր հաշվետվությունը ներկայացրեց նաև Ռուսաստանը, որից հայտնի դարձավ, որ 2013-ին այդ երկիրն Ադրբեջանին է վաճառել 10 տանկ, 10 միավոր զրահամեքենա, 438 միավոր խոշոր տրամաչափի հրետանի և 25 ուղղաթիռ:
Pingback: 2015-ին Թուրքիան նախատեսում է արտահանել շուրջ 1.6 միլիարդ դոլարի ռազմական արտադրանք | Ռազմ.info