Նիգերի տարածքում հունիսի 9-ին վայր է ընկել Ֆրանսիայի ռազմաօդային ուժերի Mirage-2000D կործանիչը։ Վթարի հետևանքով տուժածներ չկան. օդաչուները կարողացել են կատապուլտի օգնությամբ ժամանակին լքել կործանիչը։
Ցամաքում նույնպես տուժողներ չեն եղել։ Հայտնի է, որ ֆրանսիական կործանիչը Մալիում օդային պարեկությունն ավարտելուց հետո վերադառնում էր Նիգերում տեղակայված ռազմաբազա, տեղեկացնում է DefenseNews ռազմական լրատվակայքը։
Դեռ հայտնի չէ ինքնաթիռի կործանման պատճառները, դրանք հայտնաբերելու համար ներկայում աշխատանքներ են իրականացվում։
Նշենք, որ Մալիում գործողությունների համար Ֆրանսիան այս տարածաշրջանում 6 միավոր Mirage-2000D կործանիչ է պահում։ Ֆրանսիան 2013 թվականից Մալի է տեղափոխել իր զինծառայողներին, որպեսզի պայքարի կենտրոնական իշխանության դեմ ընդվզած իսլամիստական խմբավորումների դեմ։ Ներկայում աֆրիկյան այս երկրում տեղակայված է Ֆրանսիայի ԶՈւ 1600 զինծառայող։
Հավելենք, որ Mirage-2000-ը չորրորդ սերնդի բազմանպատակային կործանիչ է, արտադրվում է ֆրանսիական Dassault Aviation ընկերության կողմից սկսած 1970-ականներից։ Առաջին թռիչքը կատարել է 1978-ին, սկսել է շահագործվել 1982-ից, հիմնական շահագործողներն են Ֆրանսիան, Հնդկաստանը, ԱՄԷ-ն, Թայվանը։ Ֆրանսիան դադարեցրել է այս ինքնաթիռների արտադրությունը 2007-ին, վերջին գնորդը եղել է Հունաստանը։ Ներկայումս Ֆրանսիայի ՌՕՈւ-ն փորձում է փոխարինել այս կործանիչները Dassault Rafale կործանիչներով։