Թուրքիայի զինված ուժերը հրապարակել են հունիսի 1-ի դրությամբ անձնակազմի թվաքանակի վերաբերյալ պաշտոնական տվյալները։ Ըստ այդմ, թուրքական զինուժի ընդհանուր անձնակազմը շուրջ 671 հազար մարդ է։
Թուրքիայի ՌԾՈւ
Մայիսի սկզբի համեմատ թուրքական զինուժի անձնակազմի թվաքանակը կրճատվել է շուրջ 5 հազարով, ինչն արդյունք է ինչպես սպաների և պայմանագրային զինծառայողների, այնպես էլ ժամկետային զինծառայողների թվի կրճատման։
Ըստ Թուրքիայի ԶՈւ գլխավոր շտաբի տվյալների՝ թուրքական զինուժում գեներալների և ծովակալների թիվը 343 հոգի է, որից 311-ը՝ ցամաքային, ռազմաօդային և ռազմածովային ուժերում, 31-ը՝ ժանդարմերիայում, 1-ը՝ առափնյա անվտանգության ուժերում։ Մարտի համեմատ գեներալների թիվը փոփոխության չի ենթարկվել։
Սպաների ընդհանուր թիվը 38 940 է, որից 32 486-ը՝ ցամաքային, ռազմաօդային և ռազմածովային ուժերում, 5 851-ը՝ ժանդարմերիայում, 603-ը՝ առափնյա անվտանգության ուժերում։ Սպաների թիվը նախորդ ամսվա համեմատ պակասել է շուրջ 30-ով։
Կրտսեր հրամանատարական կազմը 95 224 մարդ է, որից 70 474-ը՝ ցամաքային, ռազմաօդային և ռազմածովային ուժերում, 23 361-ը՝ ժանդարմերիայում, 1.389-ը՝ առափնյա անվտանգության ուժերում: Այս ցուցանիշը նույնպես նվազել է շուրջ 200 հոգով։
Պայմանագրային ժանդարմների թիվը 23 407 է, հատուկ պայմանագրային կրտսեր հրամանատարների թիվը` 3157:
Պայմանագրային եֆրեյտորների ընդհանուր թիվը 51 727 մարդ է, որից 41 569-ը՝ ցամաքային, ռազմաօդային և ռազմածովային ուժերում, 9 444-ը՝ ժանդարմերիայում, 714-ը՝ առափնյա անվտանգության ուժերում։ Պայմանագրային եֆրեյտորների թիվն ավելացել է շուրջ 80 հոգով։
Շարքային կազմի ընդհանուր թիվը 405 143 մարդ է որից 278 057-ը՝ ցամաքային, ռազմաօդային և ռազմածովային ուժերում, 125 596-ը՝ ժանդարմերիայում, 1490-ը՝ առափնյա անվտանգության ուժերում։ Այսպիսով, մայիսի 1-ի տվյալների համեմատ պակասել է 4000-ով։
Քաղաքացիական ծառայողների թիվը Թուրքիայի ԶՈւ շարքերում 52 910 է, որից 48 451-ը՝ ցամաքային, ռազմաօդային և ռազմածովային ուժերում, 3.538-ը՝ ժանդարմերիայում, 921-ը՝ առափնյա անվտանգության ուժերում։
Այսպիսով, Թուրքիայի զինված ուժերի ընդհանուր թվաքանակը 670 851 մարդ է, որից զինծառայողները 617 941-ն են, իսկ քաղաքացիական անձինք` 52 910-ը:
Թուրքիայի զինված ուժերում պրոֆեսիոնալ զինծառայողներ են ընդհանուր թվի 34 տոկոսը, ինչը 1 տոկոսային կետով ցածր է մարտի սկզբի ցուցանիշից։ Ցամաքային, ռազմաօդային և ռազմածովային ուժերում 35 տոկոսն է պրոֆեսիոնալ հիմունքներով, ժանդարմերիայում` 33 տոկոսը, իսկ առափնյա անվտանգության ուժերում` 65 տոկոսը։