Մեր վիրավորների վիճակը բավարար է. Սեյրան Օհանյանն առաջնագծի դեպքերի մասին

Նրանք փորձ են անում խախտել հրադադարը` դիվերսիոն-հետախոզական գործողություններով, ինչը նախօրեին կայացել է առաջնագծում: Դիրքապահները կարողացել են արժանի հակահարված տալ։

Սեյրան Օհանյան

Այս մասին Սարդարապատի հուշահամալիրում լրագրողների հետ ճեպազրույցում ասաց պաշտպանության նախարար Սեյրան Օհանյանը։

Պաշտպանական գերատեսչության ղեկավարը շեշտեց նաև, որ ադրբեջանական կողմն արժանի հակահարված է ստացել` զոհեր և վիրավորներ ունենալով։

«Ցավոք, մենք էլ ենք ունեցել մեկ զոհ և վիրավորներ: Իսկ վիրավորների վիճակը բավարար է: Փառք ու պատիվ բոլոր տղաներին, որ պատրաստ են զոհել իրենց երիտասարդ կյանքը հանուն մեր երկրի անվտանգությանը»,-նշել է Օհանյանը։

Հիշեցնենք, որ մայիսի 27-ի լույս 28-ի գիշերը` ժամը 02:55-ի սահմաններում, շփման գծի հարավային ուղղությամբ ադրբեջանական կողմը ձեռնարկել է հերթական հետախուզադիվերսիոն ներթափանցման փորձ: Հակառակորդի դեմ ծավալված մերձամարտում զոհվել է ՊԲ զինծառայող, եֆրեյտոր, 1995-ին ծնված Էրիկ Վիլենի Գասպարյանը:

Ադրբեջանի ՊՆ-ն հաստատել է այս ուղղության առաջնագծի հատվածում իր ունեցած 2 զոհը, 1 վիրավորը։

Հայտնի են զոհված ադրբեջանցի զինծառայողների անունները՝ 1982-ին ծնված կապիտան Մամեդով Ֆիքրեթ Աքիֆ օղլուն, ադրբեջանական կողմի պնդմամբ՝ «հայ դիպուկահարի գնդակից» սպանված, 1991-ին ծնված ենթասպա Աբիլով Խուդավերդի Ֆարհադ օղլուն։ Ծանր վիրավորվել է 1994-ին ծնված շարքային Միրզազադե Մեհման Դադաշբալա օղլուն։ Առաջին բուժօգնություն ցույց տալուց հետո նրան տեղափոխել են հոսպիտալ, ներկայումս նրա վիճակը ծանր է։