Ադրբեջանական կրակից հայ զինծառայողներ են վիրավորվել: Փորձագետներն այն կարծքին են, որ ադրբեջանցիները փոխել են հրադադարի խախտման բնույթը՝ սկսելով կրակել խաղաղ բնակչության վրա: Իսրայելն, հավանաբար, Ադրբեջանում ռազմաբազա է հիմնել: ԱՄՆ-ը կփորձարկի միանգամից թշնամու 5 նշանակետ վերացնող ՀՀՊ համակարգ:
- ԼՂ արևելյան ուղղությամբ տեղակայված հայկական դիրքերի վրա հակառակորդը “ԻՍՏԻԳԼԱԼ” զինատեսակով կրակել է սանիտարական մեքենայի վրա, որի արդյունքում վիրավորվել են ՊԲ զինծառայողներ Անդրանիկ Գևորգի Մադոյանը և Էռնեստ Միքայելի Սարգսյանը:
- Զինծառայող Սուրեն Կիրակոսյանն արդեն 21 օր է հացադուլի մեջ է, բայց ոչ մեկը դրան չի արձագանքում: Նման հայտարարություն է արել զինծառայությունից խուսափելու համար դատապարտված զինվորի մայրը:
- «Մեհրաբներ» զորամասի հենակետում հրազենային վնասվածքից մահացած 22-ամյա զինծառայող Զորիկ Մերուժանի Մարգարյանի գործով ձերբակալվածներ դեռ չկան:
- «Հայ զինվորը չի կրակելու սանիտարական մեքենայի վրա, կամ խաղաղ գյուղի: Ադրբեջանական բանակը դեռ կունենա համապատասխան կորուստներ, որոնց միգուցե նորից կպահեն սառնարաններում ու ծնողներին կփոխանցեն շատ օրեր անց»,- անդրադառնալով ադրբեջանական կողմից պարբերաբար հրադադարի խախտմանը՝ ասել է ռազմական փորձագետ Արծրուն Հովհաննիսյանը:
- Ռազմական փորձագետ Դավիթ Ջամալյանը կարծում է, որ Ադրբեջանի վերջին կրակահերթերը վկայում են, որ այդ երկիրը փոխել է իր գործելաոճը` թիրախում ունենալով հասարակ քաղաքացիներին:
Միջազգային լուրերը հայկական մամուլում
- Ադրբեջանը Գաբալայի ռադիոտեղորոշիչ կայանի (ՌՏԿ) հարցում նոր նախապայման է ներկայացրել Ռուսաստանին՝ պահանջելով, որ այդ ՌՏԿ-ն չուղղվի Թուրքիայի դեմ:
- Ադրբեջանն Իսրայելին է հանձնել իր «Շիտալչայ» ռազմաբազան, որը Բաքվից 50 կմ հարավ է գտնվում:
- «Իսրայելը ձգտում է օգտագործել Ադրբեջանի ռազմակայանները՝ հարևան Իրանի միջուկային օբյեկտների ուղղությամբ օդային գրոհներ իրականացնելու նպատակով, որին Իրանը կարող է պատասխանել Ադրբեջանին ուղղված ցամաքային հակահարվածով»,- գրում է իրանագետ Ռուդիկ Յարալյանը:
- «Ադրբեջանը հայտարարում է, որ այդ ռազմաբազան օգտագործվելու է Լեռային Ղարաբաղի դեմ պատերազմում, սակայն խնդիրն այն է, որ «Սիտալչայ» ռազմաբազայում տեղակայված անօդաչու ինքնաթիռների թռիչքի տարածություն 5-6 անգամ գերազանցում է Հայաստանի հետ ունեցած սահմանը, ուստի դրանք հարևան այլ երկրների պարագայում ևս հանգիստ կարող են օգտագործվել»,- գրում է իրանական կայքը:
- Անհրաժեշտության դեպքում Իրանի ՌԾՈւ կարող են Նյու Յորքից երեք մղոն հեռավորության վրա հայտնվել: Նման հայտարարություն է արել Իսլամական հեղափոխության պաշտպանների կորպուսի ռազմածովային ուժերի հրամանատարը:
- Թուրքիան և Իրանը օդից ռմբակոծել են Հյուսիսային Իրաքը, ուր գտնվում են Քրդստանի աշխատավորական կուսակցության (PKK) ճամբարները:
- «Թուրքիայի արտաքին քաղաքականության փիլիսոփայության մեջ թշնամի երկրներ չկան։ Թուրքիայի համար երկրները բաժանվում են 2 մասի՝ բարեկամ և պոտենցիալ բարեկամ»,-ուսանողների հետ հանդիպման ժամանակ հայտարարել է Թուրքիայի ԱԳ նախարար Ահմեդ Դավութօղլուն:
- ԱՄՆ-ը կփորձարկի միանգամից թշնամու 5 նշանակետ վերացնող ՀՀՊ համակարգ:
- ԱՄՆ բանակի ծովային հետևակների կորպուսի հրամանատարությունը չորեքշաբթի օրը որոշել է հեռացնել սերժանտ Հերի Սթայնին, ով Facebook սոցիալական ցանցի իր էջում քննադատել էր երկրի նախագահ Բարաք Օբամային։
- ՆԱՏՕ-ն Կոսովոյում ավելացնում է զորքերի թիվը: Լրացուցիչ զինվորների ընդհանուր թիվը 700 է, որում ներառված է 550 գերմանական և 150 ավստրիական զինվոր:
- ԱՄՆ ևս մեկ անգամ խնդրել է միջուկային կարողություններ ունեցող երկրներին զսպվածություն ցուցաբերել, քանի որ օրերս Հնդկաստանն ու Պակիստանը բալիստիկ հրթիռներ էին փորձարկում: