Ամերիկյան General Dynamics ընկերությունը հաստատել է տեղեկությունները, ըստ որոնց՝ ընկերությունը 10 մլրդ ամերիկյան դոլարի զրահամեքենաներ է վաճառելու Սաուդյան Արաբիային: Այս մասին հայտնի է դարձել ԱՄՆ նախագահ Բարաք Օբամայի՝ Սաուդյան Արաբիա կատարած այցի ժամանակ, հայտնում է ֆրանսիական Intelligence Online պարբերականը:
LAV-25 թեթև զրահամեքենան, որի հիմքի վրա ենթադրաբար նախագծելու են Սաուդյան Արաբիային տրամադրվելիք նոր զրահամեքենաները
Զրահամեքենաները, որոնց մակնիշն ու քանակը դեռ անհայտ են, արտադրվելու են General Dynamics ընկերության Կանադայի մասնաճյուղում՝ Սաուդյան Արաբիայի գործընկերների մասնակցությամբ:
Հիշեցնենք, որ այս գործարքի մասին տեղեկություններ շրջանառվում էին դեռևս 2014-ի փետրվարին: Արտադրող ընկերության անանուն պաշտոնյաները հայտնել էին, որ ընկերությունը նախատեսում է առաջին գործարքով Սաուդյան Արաբիային վաճառել 10 մլրդ դոլարի զրահամեքենաներ, իսկ դրանից հետո կնքել 3 մլրդ դոլարի ևս մեկ գործարք:
Թեև մեքենաների մակնիշը նույնպես չէր նշվում, բայց ենթադրվում էր, որ մեքենաները կլինեն առնվազն երկու տեսակի՝ որոնցից առաջինը կլինի նոր զրահափոխադրիչ՝ 8×8 ընթացամասով, իսկ մյուսը՝ հակաականային հատուկ պաշտպանությամբ թեթև զրահամեքենա՝ 4×4 ընթացամասով: Ընդ որում՝ մեքենաների առաջին խմբաքանակն ընկերությունը պատվիրատուին պիտի հանձներ արդեն 2016-ին:
Սաուդյան Արաբիայի ու General Dynamics ընկերության միջև ռազմական համագործակցությունը սկսվել է դեռևս 1990-ականներից։ Առաջին պայմանագրով Սաուդյան Արաբիան ընկերությունից գնել է շուրջ 2500 միավոր LAV-25 զրահամեքենաներ՝ տարբեր արդիականացումների։
Հետագայում՝ 2009-ին, կողմերը կնքել են 2,2 մլրդ ԱՄՆ դոլարի ևս մեկ պայմանագիր, որով արաբական պետությունը գնել է 724 զրահամեքենաներ։ Իսկ 2011-ին 350 մլն ԱՄՆ դոլարով կնքել են հավելյալ պայմանագիր, որով ընկերությունը պարտավորվել է Սաուդյան Արաբիայի ազգային գվարդիային տրամադրել 82 զրահամեքենա՝ նախագծված LAV-25 զրահամեքենայի հիմքի վրա։