Հայաստանում տեղակայված ռուսաստանյան 102-րդ ռազմաբազայում ինժեներները սկսել են ականազերծման աշխատանքներ իրականացնել Կամխուդ և Ալագյազ ուսումնավարժական զորավարժարաններում։
Նկարը՝ ՌԴ ՊՆ կայքի
Տարվա մեջ երկու անգամ՝ ձմեռային և ամառային ուսումնական փուլերից առաջ ինժեներները տարածքները մաքրում են չպայթած զինամթերքից։
Այս մասին հայտնում է ՌԴ ՊՆ մամուլի ծառայությունը։
Մեկ ամսվա ընթացքում ինժեներները ականազերծելու են շուրջ 200 տեղամաս։ Ավելի վաղ ինժեներների հետ հատուկ պարապունքներ են անցկացվել, որի ժամանակ ուշադրություն է դարձվել չպայթած զինամթերքի հայտնաբերման, վնասազերծման և անվտանգության պահպանման աշխատանքներին։
Ինչպես նշվում է հաղորդագրության մեջ, հայտնաբերված զինամթերքն անմիջապես ոչնչացվելու է հատուկ վայրերում։
Նշենք, որ ձմեռային ուսումնական փուլի ժամանակ զորավարժարաններում տանկերից ու հրետանային միջոցներից արձակվել է շուրջ 120 հազար արկ, ինչպես նաև 350 հազար կրակոց հրաձգային զենքերից և նռնականետերից։
Հիշեցնենք, որ Ռուսաստանի 102-րդ ռազմաբազան տեղակայվել է 1995 թվականին Գյումրիում: Իրականացնում է մարտական հերթապահություն ԱՊՀ ՀՕՊ Միասնական համակարգի շրջանակներում։ Բազան հագեցած է Ս-300Վ զենիթահրթիռային համակարգերով և ՄԻԳ-29 կործանիչներով։ Անձնակազմը բաղկացած է մոտ 5 հազար հոգուց։