Խորվաթիայի զինված ուժերի գլխավոր շտաբի պետ, գեներալ Դարագո Լովրիչը մայիսի 6-ին ժամանել է Ադրբեջան պաշտոնական այցով։ Նա հանդիպել է Ադրբեջանի զինված ուժերի գլխավոր շտաբի պետ, գեներալ-գնդապետ Նաջմեդին Սադիգովին։
Դարագո Լովրիչը և Նաջմեդին Սադիգովը
Հայտնի է, որ Լովրիչի այցը տևելու է մինչև մայիսի 8-ը։
Ինչպես հաղորդում է Ադրբեջանի պաշտպանության նախարարության պաշտոնական կայքը, Լովրիչին հանդիսավոր ընդունելություն են ցույց տվել։
Երկու երկրների ՊՆ ընդլայնված հանդիպման ժամանակ, ըստ աղբյուրի, շոշափվել է Արցախյան հակամարտության թեման։ Մասնավորապես, Սադիգովը շեշտել է՝ «հայկական կողմն ագրեսիա է իրականացնում Ադրբեջանի դեմ»։
Այնուհետև կողմերը քննարկել են երկկողմ համագործակցության ընդլայնման հնարավորությունները՝ կարծիքներ փոխանակելով վերջերս ՆԱՏՕ-ի հետ համագործակցության շրջանակներում, Ադրբեջանի արևելյան Ղարադաղի շրջանի Ղարաեյբաթ զորավարժարանում անցկացված վարժանքների մասին, որոնց ընթացքում որպես դիտորդ ներկա էր Լովրիչը։
Հավելենք, որ սույն հանդիպմանը ներկա է եղել նաև Ադրբեջանում Խորվաթիայի ժամանակավոր ներկայացուցիչ Նեդա Նիլշիչը։
Նկատենք, որ դեռևս 2013-ի փետրվարին Բաքու էր այցելել Խորվաթիայի պաշտպանության նախարար Անտե Կոտրոմանովիչը։ Նա հանդիպել էր Ադրբեջանի այդ ժամանակվա իր պաշտոնակից Սաֆար Աբիևի հետ։ Հանդիպման ավարտին կնքվել էր ռազմատեխնիկական բնագավառում երկկողմ փոխըմբռնման արձանագրություն։
2013-ի ընթացքում Ադրբեջանը ռազմական կցորդներ էր նշանակել մի քանի երկրներում, այդ թվում՝ Խորվաթիայում։
Նշենք, որ Ադրբեջանն ու Խորվաթիան լայնորեն համագործակցում են ականազերծման բնագավառում։ Այսպես, դեռևս 2009-ին Խորվաթիայի ականազերծման կենտրոնի (CROMAC) և ANAMA-ի միջև կնքվել է մարդասիրական ականազերծման համաձայնագիր: 2013-ի մարտի 27-ին CROMAC-ի և Խորվաթիայում Ադրբեջանի դեսպանի հանդիպման ժամանակ քննարկվել էր Թուրքիայի հետ սահմանային տարածքների ականզերծման նախագիծը: