Ռուսաստանն ու Բելառուսը 2014 թվականին նախատեսում են մարտավարական զորավարժություն անցկացնել, որին ներգրավվելու են ինժեներական, ինչպես նաև քիմիական, ճառագայթման, կենսաբանական զենքերի դեմ պաշտպանության ստորաբաժանումները։
«Արևմուտք-2013» զորավարժությունից
Այս մասին լրագրողներին հայտնել է Բելառուսի ռազմաօդային ուժերի և հակաօդային պաշտպանության զորքերի հրամանատարի տեղակալ, գեներալ-մայոր Իգոր Գոլուբը։
«Նախատեսվածի համաձայն համատեղ զորավարժություններ արվում են, բայց մասշտաբային զորավարժություն լինում է 2 տարին մեկ անգամ (հեղ-նկատի ունի «Արևմուտք» զորավարժությունը)։ Այդ իսկ պատճառով այս տարի մանևրեր կլինեն նաև համաժողովների, մարտավարական վարժանքներին զուգընթաց»,- հայտարարել է Գոլուբը։
Ըստ նրա՝ զորավարժությունները կանցկացվեն ինչպես Բելառուսի, այնպես էլ Ռուսաստանի տարածքում։
Հավելենք, որ ապրիլի 21-ին Ռուսաստանի և Բելառուսի ռազմաօդային ուժերի ավելի քան 150 ներկայացուցիչներ համատեղ համաժողովի համար հանդիպել էին Աստրախանի շրջանի Աշուլուք զորավարժարանում, որտեղ համաժողովին զուգահեռ զինծառայողները կրակելու էին Ս-300 զենիթահրթիռային համակարգերից, Պանցիր-Ս զենիթահրթիռային հրանոթային համալիրներից, ինչպես նաև ռմբակոծելու և հրթիռներ էին արձակելու Սու-34, Սու-35, Յակ-130 և ՄիԳ-29 ինքնաթիռներից։
Ապրիլի 21-25-ին անցկացված համաժողովը նախագահել է ՌԴ ռազմաօդային ուժերի հրամանատար, գեներալ-լեյտենանտ Վիկտոր Բոնդարևը։
Հիշեցնենք, որ Ռուսաստանն ու Բելառուսը տարվա ընթացքում մի քանի խոշոր զորավարժություն են իրականացնում, որից ամենախոշորն ու հայտնին «Արևմուտքն» է։