Ռուսաստանը փորձարկում է ռոբոտիզացված նոր համակարգը

Ռուսաստանը մերձմոսկովյան Սերպուխով զորավարժարանում փորձարկել է իր նոր հետախուզական շարժական համակարգը։ Այս ռոբոտիզացված համակարգը ղեկավարվում է 5 կմ հեռավարությունից, սարքի օպերատոր կարող է լինել յուրաքանչյուր սպա, ով ունի տարրական գիտելիքներ համակարգից։

Ռուսական հեռակառավարվող զրահապատ ռոբոտ՝ ցուցադրական երթը

Ըստ ռուսական աղբյուրների՝ այս սարքի նպատակը մարդկային զոհերի բացառումն է, քանի որ օպերատորը ռազմական գործողությունների վայրից բավական հեռու է լինելու, ըստ այդմ՝ զոհվելու հավանականությունը նվազագույնի է հասնելու։

Թեև սարքը ռոբոտիզացված է, բայց կրակի վարման հրամանը տալիս է այն ղեկավարողը։ Ինչպես տեղեկացնում են աղբյուրները, սարքին կարող է միանգամից տրվել մինչև 10 թիրախ ոչնչացնելու հրաման։

Բացի այդ, սարքի փորձարկման մյուս նպատակներից էր ստուգել ռոբոտիզացված համակարգի և Թայֆուն-Մ հակադիվերսիոն մեքենայի փոխգործակցությունը Տոպոլ միջմայրցամաքային բալիստիկ հրթիռային համալիրների անվտանգության ապահովման գործում։

Թայֆուն-Մ հակադիվերսիոն մեքենա

Ըստ ռոբոտիզացված համակարգի ստեղծողների՝ հնարավոր է լինելու ռոբոտին կառավարել անմիջապես Թայֆուն-Մ-ի խցիկից։

Նշենք, որ ռոբոտը նախագծել են Իժևսկի ռադիոգործարանն ու «Ուրալվագոնզավոդը»։ Առաջին անգամ ներկայացվել RAE-2013 ցուցահանդեսում, ցուցադրական պտույտներ է կատարել ու կրակ վարել։

Թրթուռավոր ռոբոտը նախատեսված է ստացիոնար ու շարժվող թիրախներ հայտնաբերելու ու ոչնչացնելու, կրակային աջակցման ու զորային հետախուզության համար։ Նրա վրա տեղադրված է 12,7 մմ «Կորդ» գնդացիր, սակայն հնարավորություն կա տեղադրել այլ սպառազինություն։