7,500 ԱՄՆ դոլար կաշառք` զինվորի սպանության պատիժը մեղմելու համար

ՀՀ դատախազության պաշտոնական կայքից տեղեկանում ենք, որ ծառայակից ընկերոջը սպանած զինծառայողի նկատմամբ պատիժը մեղմելու համար` N զորամասի դասակի հրամանատարը մեղադրյալի հարազատներից 7,500 ԱՄՆ դոլար է վերցրել և փոխանցել կայազորի զինվորական դատախազության դատախազին:

ՀՀ գլխավոր դատախազի որոշմամբ հարուցվել է քրեական գործ` պաշտոնատար անձի կողմից  առանձնապես խոշոր չափերով կաշառք ստանալու, պաշտոնեական դիրքն օգտագործելու միջոցով կաշառքի միջնորդություն կատարելու դեպքի առթիվ:

Քրեական գործի հարուցման հիմք է հանդիսացել թիվ N զորամասի դասակի հրամանատարի ներկայացրած  հաղորդումը, ըստ որի թիվ N զորամասի զինծառայողին սպանելու եւ ծառայության կանոնները խախտելու մեջ մեղադրվող մեկ այլ զինծառայողի նկատմամբ համեմատաբար մեղմ՝ 8 տարի 6 ամիս ժամկետով պատիժ սահմանելու եւ հետագայում պատժի կրումից պայմանական վաղաժամկետ ազատելու համար մեղադրյալի հարազատներից ստացել է 7.500 ԱՄՆ դոլար, որից 7.000 դոլարը փոխանցել է  կայազորի զինվորական դատախազության դատախազին: Ըստ հաղորդման՝ վերջինս, համապատասխան պայմանավորվածություններ ձեռք բերելով առանձին պաշտոնատար անձանց հետ, որպես միջնորդ հանդես գալով, գումարը փոխանցել է նրանց:

Նկատի ունենալով, որ հաղորդման հիման վրա նախապատրաստված նյութերում առկա են  ՀՀ քրեական օրենսգրքի 311-րդ հոդվածի 4-րդ մասի 2-րդ կետով եւ 313-րդ հոդվածի 2-րդ մասի 2-րդ կետով նախատեսված հանցավործության հատկանիշներ, որոնք ստուգելու համար անհրաժեշտ է ձեռնարկել համապատասխան քննչական գործողություններ՝ ՀՀ գլխավոր դատախազի որոշմամբ 14.10.11թ. հարուցվել է քրեական գործ, իսկ նախաքննության կատարումը հանձնարարվել է ՀՀ հատուկ քննչական ծառայությանը:

Հաղորդում ներկայացրած անձի, ինչպես նաեւ հաղորդման մեջ հիշատակված անձանց անունները չեն հրապարակվում՝ քրեական գործի նախաքննության շահերից ելնելով, ինչպես նաեւ` հաղորդում ներկայացրած անձի նկատմամբ շահագրգիռ անձանց կողմից հնարավոր ներգործության դրսեւորումները բացառելու նպատակով:

Նախաքննության արդյունքների մասին տեղեկատվություն կտրամադրվի լրացուցիչ:

Սկզբնաղբյուր`  Հարուցվել է քրեական գործ` կաշառք ստանալու մասին ստացված հաղորդման հիման վրա

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *