Թուրքիան որոշեց ընդունել առաջին A400M ինքնաթիռը

Թուրքիան վերջապես համաձայնել է ստանալ իր առաջին A400M բեռնատար ինքնաթիռը, թեև վերջին ամիսներին թուրքական կողմը հրաժարվում էր ընդունել այն։

A400M. Թուրքիայի ԶՈւ

A400M. Թուրքիայի ԶՈւ

Առաջին A400M ինքնաթիռը վերջնականապես Թուրքիային հանձնելու համար ապրիլի 4-ին հայտարարել է Airbus Group ընկերությունը։ Ինքնաթիռը թուրքական կողմին է հանձնվել իսպանական Սևիլիա քաղաքում։ Ընդունման հանդիսավոր արարողությունն ավելի ուշ անցկացվելու է Թուրքիայում։

Փետրվարին Airbus Group-ի գործադիր տնօրեն Թոմաս Էնդերսը հայտարարել էր, թե Թուրքիային տրամադրվել է նույն ինքնաթիռից, ինչ և Ֆրանսիայի զինված ուժերին, որն անմիջապես սկսել են շահագործել այն։ Էնդերսի խոսքերով՝ Թուրքիայի՝ ինքնաթիռի ընդունման հետ կապված խնդիրներ առաջացնելն անընդունելի է։

Ավելի ուշ հայտարարությամբ էր հանդես եկել նաև Թուրքիայի ռազմարդյունաբերության քարտուղարության արդեն նախկին ղեկավար Մուրադ Բայարը, ով պահանջել է Airbus Group-ից կատարել կնքված պայմանագրի բոլոր կետերը, ինչպես նաև հավելել, որ իրենք պատրաստվում են տուգանել ընկերությանն առաջին ինքնաթիռի ուշացման համար։

Կողմերը չեն մանրամասնել, թե կոնկրետ ինչն է A400M-ի վերջնական հանձնմանը խանգարում։ Airbus-ը վերջնական փորձարկումների համար A400M ինքնաթիռը Թուրքիային էր տրամադրել դեռևս 2013-ի դեկտեմբերին։ Փորձարկումների ժամանակ հայտնի էր դարձել, որ ի հայտ են եկել որոշակի խնդիրներ, սակայն չէին հստակեցվում, թե ինչ տեսակի։

Համաձայնության գալուց հետո էլ հայտնի չէ, թե ինչ խնդիրներ են ունեցել կողմերը։

Թուրքիայի զինված ուժերն ընդհանուր ստանալու է 10 միավոր նորագույն ինքնաթիռներից, ինչի համար վճարելու է 1,5 մլրդ ամերիկյան դոլար։ Սպասվում է, որ A400M-երը Թուրքիային կփոխանցվեն առաջիկա 4 տարիների ընթացքում։

Թուրքական առաջին A400M-ը տեղակայվելու է Կայսերիի (Կեսարիա) 221-րդ ավիաբազայում։ Այն արդեն ստացել է հայտնի թուրք ըմբիշ Քոջա Յուսուֆի անունը։

Եվրոպական Airbus Military ընկերության արտադրած A400M Atlas բեռնատար ինքնաթիռն ունակ է տեղափոխել մինչև 37 տոննա բեռ կամ 116 մարդ, ինչպես նաև կարող է օդում լիցքավորել կործանիչներ և այլ ինքնաթիռներ։ Այն կարող է զարգացնել մինչև 790 կմ/ժ արագություն, թռիչքներ կատարել 9,3 հազար կմ հեռավորության վրա։

A400M ինքնաթիռների ստեղծման գործընթացը սկսվել է 2000-ականների սկզբին: Առաջին թռիչքը կատարել է 2009 թվականին։ Մեկ միավոր ինքնաթիռի մոտավոր արժեքն է 136 մլն եվրո։

Ինքնաթիռի ստեղծման աշխատանքներին և ֆինանսավորմանը մասնակցել են Ֆրանսիան, Գերմանիան, Մեծ Բրիտանիան, Իսպանիան, Լյուքսեմբուրգը, Բելգիան, Մալայզիան, ինչպես նաև Թուրքիան, որոնք էլ նախատեսում են ստանալ ընդհանուր 174 միավոր A400M:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *