Սիրիայում արձանագրվել է ամերիկյան TOW հակատանկային հրթիռային համալիրի կիրառում

2014-ի ապրիլի 5-ին համացանցում հայտնվել է Սիրիայի Հիշ բնակավայրի մերձակայքում արված տեսագրություն, որում երևում է՝ կառավարական ուժերի դեմ կռվող զինյալներն իրենց տրամադրության տակ ունեն ամերիկյան արտադրության TOW  հակատանկային հրթիռային համալիր։ Հարկ է նշել, որ սիրիական բանակի սպառազինությունում նման զինատեսակի առկայության մասին որևէ հիշատակում չի եղել։ TOW հակատանկային հրթիռյաին համալիրի առկայության մասին չի հիշատակվել նաև զինյալների զինանոցին վերաբերող տվյալներում։

TOW հակատանկային հրթիռային համալիրը Սիրիայում

TOW հակատանկային հրթիռային համալիրը Սիրիայում

Առայժմ հայտնի չէ, թե որ պետությունն է զինյալներին փոխանցել այս զինատեսակը, սակայն որպես հավանական տարբերակ արաբական մի շարք երկրներից բացի, հարկ է նշել նաև Թուրքիան։

Նման պնդում անելու հիմք է տալիս 2014-ի մարտի 30-ին համացանցում հայտնված գաղտնի արված ձայնագրությունը, որում Թուրքիայի Ազգային հետախուզական կազմակերպության ղեկավար Հաքան Ֆիդանն արտգործնախարարի աշխատասենյակում հրավիրված աշխատանքային խորհրդակցության ժամանակ նշում է, որ սիրիական ճգնաժամի ընթացքում Թուրքիան մեծաքանակ սպառազինություն է տրամադրել զինյալներին։

Հիշեցնենք, որ ավելի վաղ՝ 2013-ի հունիսին, համացանցում հայտնված հերթական տեսագրությունից հայտնի էր դարձել, որ Սիրիայում մարտնչող զինյալներն ի թիվս այլ զինատեսկաների, իրենց տրամադրության տակ ունեն նաև չինաստանյան արտադրության HJ-8 հակատանկային հրթիռային համալիրներ։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *