Պաշտոնական այցով Իսպանիա էր մեկնել պաշտպանության նախարարը։ Վրաստան են ժամանել ՆԱՏՕ-ի խորհրդարանական վեհաժողովի ներկայացուցիչները։ Լրացել է զինված ուժերի սերժանտների վերապատրաստման կենտրոնի հիմնադրման 11-րդ տարելիցը։ Զոհվել է ժամկետային զինծառայող։ Վրաստանի և Սլովակիայի պաշտպանության նախարարները ստորագրել են համագործակցության հուշագիր։
” Վրաստանի պաշտպանության նախարար Իրակլի Ալասանիան եռօրյա այցով մեկնել էր Իսպանիա, որտեղ կայացել է երկու երկրների պաշտպանության նախարարների հանդիպումը։ Նախարարները քննարկել են պաշտպանության ոլորտում երկկողմ համագործակցության զարգացման հեռանկարները։ Հատուկ ուշադրություն է դարձվել պատրաստության և կրթական ոլորտներին։ Այցի ընթացքում Ալասանիան եղել է նաև Իսպանիայի զինված ուժերի ավիացիոն ռազմակայանում ու «հակազրահային» բրիգադում։
” Քառօրյա այցով Վրաստանի պաշտպանության նախարարությունում էր ՆԱՏՕ-ի գնահատման խումբը։ Պատվիրակության ղեկավարն էր ՆԱՏՕ-ի շտաբ-բնակարանի պլանավորման տնօրինության ղեկավար Ֆրենք Բոլանդը, ում մարտի 26-ին հանդիպել է Վրաստանի ՊՆ տեղակալ Միխայիլ Դարչիաշվիլին։ Կողմերը քննարկել են Վրաստանի պաշտպանության ոլորտում իրականացված և ներկայումս ընթացող բարեփոխումները։
” Մարտի 24-ին Վրաստանի պաշտպանության նախարարի տեղակալ Միխայիլ Դարչիաշվիլին հանդիպել է ՆԱՏՕ-ի խորհրդարանական վեհաժողովի քաղաքական հանձնաժողովի ներկայացուցիչներին։ Հանդիպման ընթացքում քննարկվել են Վրաստանի՝ ՆԱՏՕ ինտեգրմանն, ինչպես նաև հետագա համագործակցությանն առնչվող հարցեր։ Այցի ընթացքում պատվիրակության անդամները եղել են նաև Վրաստանի ԶՈւ Վազիանի ռազմակայանում տեղակայված չորրորդ մեխանիզացված բրիգադում։
” Պաշտպանության նախարարության մասնագիտական զարգացման կենտրոնում մեկնարկել է մարդկային ռեսուրսների կառավարման փորձնական ծրագիրը, որի նպատակն է նախարարության համապատասխան ոլորտի աշխատակիցների մասնագիտական ունակությունների բարձրացումը։
” Զինված ուժերի սերժանտների վերապատրաստման կենտրոնի ստեղծման 11-րդ տարելիցի կապակցությամբ դրա սաներին և անձնակազմին շնորհավորելու էին եկել պաշտպանության նախարարի տեղակալ Վակո Ավալիանին, ԶՈւ գլխավոր սերժանտ Ալուդա Կոպալիանին և ԶՈւ գլխավոր շտաբի ներկայացուցիչները։
” Զենքի հետ անզգույշ վարվելու հետևանքով մահացել է զինված ուժերի ժամկետային զինծառայող, 1994-ին ծնված շարքային Լաշա Տաբուկաշվիլին, ով զինծառայություն էր անցնում 2013 թվականից։
” ԱՄՆ աջակցությամբ 2016-ից Վրաստանում գործունեություն կսկսի զինվորականների համար նախատեսված վերականգնողական կենտրոնը։ Համապատասխան համաձայնագիրը կողմերի միջև արդեն ստորագրվել է։ Դրանով ամերիկյան կողմը պարտավորվում է հատկացնել համապատասխան սարքավորումներ և տեխնոլոգիաներ։
” Վրաստանի և Սլովակիայի պաշտպանության նախարարները ստորագրել են ռազմական համագործակցության հուշագիր, որը ենթադրում է փորձի փոխանակում ռազմատեխնիկական համագործակցության և մի շարք այլ ոլորտներում։
” Մարտի 27-ին վրաստանյան մի շարք բուհերի ուսանողներ այցելել են զինված ուժերի ազգային ուսումնական կենտրոն։ Հյուրերը տեղում ծանոթացել են կենտրոնի գործունեությանն ու գործառույթներին։
” Վրաստանի պաշտպանության նախարարության պատվիրակությունը փոխնախարար Միխայիլ Դարչիաշվիլու գլխավորությամբ մարտի 28-ին այցելել է Ադրբեջանի պաշտպանության նախարարություն։ Այցի ընթացքում Դարչիաշվիլին աշխատանքային հանդիպումներ է ունեցել Ադրբեջանի ՊՆ Զաքիր Հասանովի և փոխնախարար Չինգիզ Մամեդովի հետ։
Ռազմաշաբաթը նաև՝
Հայաստանում
Ադրբեջանում
Թուրքիայում