ՌԴ կառավարությունը երկրի նախագահ Վլադիմիր Պուտինի վավերացմանն է փոխանցել 2013-ի ամռանը ստորագրած, Հայաստանի ու ՌԴ-ի ռազմատեխնիկական համագործակցության պայմանագրի փաստաթուղթը։
Ինչպես հետևում է ՌԴ կառավարության պաշտոնական կայքից, ՌԴ կառավարությունն իր հերթին այն վավերացրել էր 2014-ի մարտի սկզբին։
Պայմանագիրը ենթադրում է կողմերի փոխգործակցությունը սպառազինության և ռազմական տեխնիկայի ստեղծման, արտադրման, շահագործման, վերանորոգման, արդիականացման, կիրառման ժամկետների երկարաձգման, ինչպես նաև ոչնչացման ոլորտներում։ Շեշտված է, որ ռազմական նշանակության արտադրանքի փոխանցումը մի երկրի տարածքից մյուսն իրականացվելու է ոչ թե հատուկ վավերագրերի կամ որոշումների ընդունման, այլ կողմերի լիազոր մարմինների կողմից տրվող դուրսգրման փաստաթղթերի միջոցով։
Ընդ որում, պայմանագիրը հնարավորություն է տալիս առանձին պայմանագրեր կնքել ոչ միայն ռազմատեխնիկական համագործակցության սուբյեկտ-կազմակերպությունների, այլև այն ընկերությունների հետ, որոնք ռազմական նշանակության արտադրանքի արտաքին առևտրի իրավասություն չունեն։
Հիշեցնենք, որ ՀՀ ԱԺ-ն որոշում էր ընդունել վավերացնելու սույն պայմանագիրը 2013-ի դեկտեմբերին։
Հավելենք նաև, որ պայմանագրի շրջանակներում է Հայաստանում տեղակայված ՌԴ ԶՈւ Հարավային ռազմական օկրուգի 102-րդ ռազմակայանի բաղադրիչ Էրեբունի օդանավակայանում օկրուգի հրամանատարության կողմից կազմավորվելիք Մի-24Պ, Մի-8ՄՏ, Մի-8ՍՄՎ ուղղաթիռների էսկադրիլիան։ Պլանով նախատեսված բոլոր ուղղաթիռների տրամադրումն Էրեբունի օդակայանին նախատեսված է ավարտել ընթացիկ տարում։