ԱՄՆ ռազմածովային ուժերի USS Truxtun հրթիռային ականակիր նավը 2014-ի մարտի 21-ին լքել է Սև ծովի ավազանը։ Մարտի 7-ից այստեղ նավարկող ռազմանավը Ռումինիայի և Բուլղարիայի ռազմածովային ուժերի հետ անցկացրել է նաև համատեղ զորավարժություն։ Այս մասին հայտնում է ամերիկյան Stripes ռազմական լրատվակայքը։
USS Truxtun ռազմանավը Բոսֆորի նեղուցում. լուսանկարը՝ Associated Press գործակալության
Ռազմանավի ժամանումը և Սև ծովում համատեղ զորվարժություններին մասնակցությունը նախատեսված էր դեռ վաղուց, սակայն ԱՄՆ ռազմածովային ուժերի (ՌԾՈւ) հրամանատարությունը որոշեց երկարացնել Truxtun-ի պարեկությունն այս շրջանում՝ Ղրիմում ծայր առած իրադարձությունների պատճառով։
Սև ծովի ավազանում նավարության ընթացքում ռազմանավը զորավարժությանը մասնակցելուց բացի, իրականացրել է նաև մի շարք մանևրներ չեզոք ջրերում։ Միևնույն ժամանակ նավարկության հիմնական երթուղուց շեղվել և Միջերկրական ծովի արևելյան ափերում էր կանգ առել ԱՄՆ ՌԾՈւ հարվածային ավիակիր խումբը՝ USS George Bush ավիակրի գլխավորությամբ։
ՌԾՈւ ղեկավարությունը բացատրում էր դա Ուկրաինայում ծայր առած իրավիճակով և Ռուսաստանի հնարավոր անկանխատեսելի քայլերին պատրաստ լինելու անհրաժեշտությամբ։ Սակայն մարտի 21-ին արդեն հայտնի դարձավ, որ ավիակիր խումբը շարունակել է իր նավարկությունը, իսկ Truxtun ռազմանավն էլ լքում է Սև ծովի ավազանը։
Նշենք, որ 380 հոգանոց անձնակազմ ունեցող Truxtun հրթիռային ականակիր նավը արշավային երթով կարող է նավարկել մինչև 8 000 կմ։ Ռազմանավն ունի հրթիռային տարատեսակ սպառազինություն, այդ թվում՝ Tomahawk թևավոր հրթիռներ։ Truxtun-ի վրա առկա է սովորական և զենիթային հրետանի, ինչպես նաև տորպեդներ։ Անհրաժեշտության դեպքում տախտակամածի վրա կարող է վայրէջք կատարել մինչև երկու ուղղաթիռ։