ԱՄՆ ռազմածովային ուժերի հարվածային ավիակիր խումբը USS George Bush ատոմային ավիակրի գլխավորությամբ լքել է Միջերկրական ծովի արևելյան ափերը՝ մնալով այստեղ գրեթե մեկ շաբաթ։ Այս մասին հաղորդում է Stripes ռազմական լրատվակայքը՝ հղում անելով ԱՄՆ ռազմածովային ուժերի տարածած հաղորդագրությանը։
Ներկայումս ավիակիր խումբը ռազմածովային ուժերի օպերատիվ հինգերորդ նավատորմի պատասխանատվության գոտում է, որը ներառում է Կարմիր ծովը, Պարսից ծոցն ու Հնդկական օվկիանոսի հյուսիս-արևմտյան հատվածը։
Ի սկզբանե դեպի Մերձավոր Արևելք նավարկող ավիակիր խումբը ԱՄՆ ռազմածովային ուժերի (ՌԾՈւ) հրամանատարության որոշմամբ կանգ էր առել Միջերկրականում՝ ի աջակցություն ՆԱՏՕ-ի անդամ երկրներին, որոնք մտահոգված էին Ուկրաինայում Ռուսաստանի կողմից սպասվող հնարավոր անկանխատեսելի քայլերով։
Նշենք, որ հարվածային այս ավիակիր խմբի մեջ մտնում են USS George Bush (Ջորջ Բուշ) ատոմային ավիակիրը, հարակից 4 ռազմանավ, ինքնաթիռային 8 էսկադրիլիա և 6 000 զինծառայող։ Ավիակիր խմբի մեջ է մտնում նաև Truxton հրթիռային ականակիր նավը, որն այս ընթացքում համատեղ զորավարժություն էր անցկացնում Բուլղարիայի և Ռումինիայի ՌԾՈւ ռազմանավերի հետ՝ Սև ծովի ավազանում։