Թուրքիայի Նիղդե նահանգի Ուլուքըշլա շրջանում անհայտ անձինք կրակ են բացել ավտոճանապարհի հսկողություն իրականացնող թուրք ոստիկանների և զինծառայողների վրա։
Մարտի 20-ի ցերեկային ժամերին ստուգման ժամանակ ոստիկանների կանգնեցրած միկրոավտոբուսից մի քանի մարդ է իջել, ովքեր ինքնաձիգերով կրակ են բացել ոստիկանների և ժանդարմների վրա։
Կրակահերթերի հետևանքով Թուրքիայի ԶՈւ ժանդարմերիայի 2 զինծառայող և ոստիկանության 1 աշխատակից է սպանվել, ևս 4 զինծառայող վիրավորվել է, տեղեկացնում է թուրքական պետական «Անադոլու» լրատվական գործակալությունը։
CNNTurk հեռուստաալիքը, հղում կատարելով Թուրքիայի ներքին գործերի նախարարության հայտարարությանը, նշում է 1 ոստիկանի, 1 ժանդարմի և հարձակում գործած անձանցից մեկի մահվան մասին։
«Անադոլուի» տվյալներով՝ հարձակումից հետո զինված անձինք իրենց ավտոմեքենայով փախուստի են դիմել։ Թուրք իրավապահների հատուկ գործողության արդյունքում հարձակում գործած 3 անձանցից 2-ը ձերբակալվել են, մյուսին հայտնաբերելու աշխատանքները
շարունակվում են։
Ականատեսների վկայությամբ՝ հարձակում գործած անձինք նաև նռնակ են նետել ժանդարմների ուղղությամբ։
Թե ովքեր են հարձակում գործած անձինք, դեռ չի նշվում։