Հայաստանում տեղակայված բարձրլեռնային Ալագյազ և Կամխուդ զորավարժարաններում մարտական կրակով գումարտակի մարտավարական պարապունքներ են անցկացնում ՌԴ զինուժի հարավային ռազմական օկրուգի զինծառայողները։ Զորավարժությունը ղեկավարում է ռուսաստանյան 102-րդ ռազմաբազայի հրամանատար, գնդապետ Անդրեյ Ռուզինսկին։
Այս մասին տեղեկացնում է ՌԴ պաշտպանության նախարարության մամուլի ծառայությունը։
Վարժանքներին մասնակցում է ավելի քան 300 զինծառայող, օգտագործվում է մոտ 50 միավոր ռազմական տեխնիկա, ինչպես նաև ՀՌՕ-ի ավիացիան։
Մինչև բուն զորավարժության մեկնարկը, տանկերով և հրետանիով զինված գումարտակը մշտական տեղակայման վայրից 100 կմ երթով գնացել է զորավարժարաններ։
Երթի ընթացքում զինծառայողները փորձել են հաղթահարել ավիացիայի, ինչպես նաև դիվերսիոն-հետախուզական խմբերի հարվածները։
Զորավարժության կրակային փուլի ժամանակ պայմանական հակառակորդի հրետանու և տանկերի ոչնչացման համար օգտագործվելու են հայրենական և ճակատային ավիացիան։
Զորավարժության ողջ ընթացքը վերհսկվելու է Նավոդչիկ-2 անօդաչու թռչող սարքի միջոցով։
Նշենք, որ դեռ 2014 թվականի փետրվարի սկզբին Հայաստանում տեղակայված ռուսաստանյան 102-րդ ռազմաբազայի զինվորականները փորձարկում էին «Նավոդչիկ-2» նոր անօդաչու թռչող սարքը։
«Նավոդչիկ-2» ԱԹՍ-ները կիրառում են հետախուզության և այլ շրջանակներում։ Ունակ են կատարել մարտական առաջադրանքներ օրվա տարբեր ժամերին՝ ֆոտո, վիդեո և ինֆրակարմիր մոդուլների շնորհիվ։ Դրանք թույլ են տալիս հակառակորդին հայտնաբերել նաև պատսպարաններում։
ԱԹՍ-ի առավելագույն արագությունը 120 կմ/ժ է, թռիչքի բարձրությունը՝ մինչև 3 հազար մ, զանգվածը՝ 7 կգ, գործարկման հեռավորությունը՝ մինչև 25 կմ, օդում կարող է մնալ 3 ժամ։