Սևաստոպոլում Ուկրաինայի ռազմածովային ուժերի շտաբի դիմաց վաղ առավոտյան սկսված ցույցի մասնակիցները գրոհով վերցրել են այն։ Ցուցարարները ուկրաինական զինուժի շտաբի վրա տեղադրել են Ռուսաստանի դրոշը։ Այս մասին տեղեկացնում է ռուսաստանյան ԻՏԱՌ ՏԱՍՍ գործակալությունը։
Ուկրաինական նավատորմի դրոշները
Ցույցը սկսվել է առավոտյան 8։00-ի սահմաններում։ Սկզբում շտաբի մոտ հավաքվել են մի քանի տասնյակ մարդ, ապա նրանց թիվը հաշվվել է հարյուրներով։ Ցուցարարների թվի մեծանալուն պես նրանք հարձակվել են շտաբի վրա ու գրավել այն։ Հնարավոր տուժածների մասին տեղեկություններ դեռ չկան։
Նշենք, որ մարտի 18-ին Ռուսաստանի նախագահ Վլադիմիր Պուտինը, Ղրիմի կառավարության ղեկավար Սերգեյ Ակսենովը, Ղրիմի խորհրդարանի խոսնակ Վլադիմիր Կոնստանտինովը և Սևաստոպոլի ղեկավար Ալեքսեյ Չալիյը պայմանագիր ստորագրեցին, որով Ղրիմը և Սևաստոպոլն ընդգրկվում են Ռուսաստանի Դաշնության կազմում։ Պայմանագրի կնքումից հետո նախօրեին իրավիճակը սրվեց Ղրիմում. երեկոյան տեղեկություններ էին շրջանառվում, թե անհայտ դիպուկահարը կրակ է բացել ուկրաինացի զինծառայողների և Ղրիմի ինքնապաշտպանության ուժերի անդամների վրա։ Ուկրաինայի ՊՆ-ն էլ հայտարարել էր, որ Ղրիմում տեղակայված ուկրաինականզինծառայողներին թույլատրվել է հրազեն կիրառել։