Ադրբեջանի զինված ուժերի ռազմական ակադեմիայում մարտի 18-ին կայացել է ՆԱՏՕ-ի փորձագիտական խմբի և Ադրբեջանի պաշտպանության նախարարության ներկայացուցիչների աշխատանքային հանդիպումը, որը միտված է ռազմակրթական մի շարք հարցերի քննարկմանը։
Ինչպես հաղորդում է Ադրբեջանի ՊՆ մամուլի ծառայությունը, հանդիպման ընթացքում անդրադարձ է կատարվել ՆԱՏՕ-ի անդամ երկրների՝ ռազմակրթական ոլորտում ունեցած փորձի և դասավանդման մեթոդների կիրառման ու տեղայնացման հնարավորությանն Ադրբեջանի զինուժում։
Հանդիպման ավարտին անցկացվել են ԱՄՆ ռազմածովային ուժերի ազգային անվտանգության գծով ռազմական ակադեմիայի դասախոս Թոմաս Ֆեթսի, ինչպես նաև ՆԱՏՕ-ի միջազգային շտաբի քաղաքական հարցերի ու անվտանգության քաղաքականության գծով վարչության փորձագետ, Լեհաստանը ներկայացնող Մարիուշ Սոլիսի դասախոսությունները։
Համաձայն աղբյուրի՝ սույն աշխատանքային այցն ավարտվելու է մարտի 19-ին։