Հունաստանը կսկսի իր 4 սուզանավերի շահագործումը

Հունաստանի ռազմածովային ուժերը նախատեսում է վերջապես շահագործել Type 214 տեսակի իր սուզանավերը։ Թվով 4 սուզանավերն արդեն պատրաստ կանգնեցված են Աթենքից ոչ հեռու Սկարամանգասի նավահանգստի հունական նավաշինարանում։
Այս մասին մարտի 15-ին հայտարարել է Հունաստանի ազգային պաշտպանության նախարար Դիմիտրիս Ավրամոպուլոսը։
Նշվում է, որ սուզանավերը Սկարամանգասի նավահանգստից պիտի տեղափոխվեն հունական նավատորմի պահեստ, որտեղ էլ որոշակի արդիականացման կենթարկվեն։ Դրանից հետո Կրետե կղզու մոտ Սուդա ծովածոցում սուզանավերը փորձարկումներ կանցնեն և նոր միան կհանձնվեն շահագործման։
Հայտարարվել է նաև, որ այս ամբողջ գործընթացի արժեքը մոտավորապես 105 մլն ամերիկյան դոլար է, ինչը Հունաստանի նավատորմի բյուջեի համար արդեն հասանելի թիվ է։
Տեղեկացնենք, որ առաջին երեք սուզանավերի կառուցման մասին պայմանագիր կնքվել է 2000 թվականի փետրվարի 15-ին, իսկ ահա չորրորդ սուզանավը Հունաստանը պատվիրել է 2002 թվականին։
Հետաքրքրական է, որ առաջին սուզանավը կառուցվել է Գերմանիայի ամենամեծ Howaldtswerke-Deutsche Werft նավաշինարանում, իսկ մյուս երեքն արդեն Հունաստանի Սկարամանգասի նավահանգստի հունական նավաշինարանում։
Type 214 տեսակի սուզանավերը գերմանական արտադրության սուզանավեր են, աշխատում են էլեկտրադիզելային շարժիչով։ Երկարությունը 65 մետր է, իսկ լայնությունը՝ 6.3 մ։ ԱՆձնակազմը 27 հոգի է։ Մեկ սուզանավի արժեքը 2008 թվականի դրությամբ 330 մլն ամերիկյան դոլար է։