Ռուսաստանի Դաշնության Կրասնոյարսկի շրջանում 2014-ի մարտի 10-ին կայացած տնտեսական համաժողովի ընթացքում ՌԴ ռազմական արդյունաբերության ոլորտը ներկայացնող հանձնաժողովը նշել է, որ Արկտիկայում անհրաժեշտ դիտարկումներն անցկացնելու և իրավիճակը հսկողության տակ պահելու համար անհրաժեշտ է հիմնել հեռանկարային անօդաչու թռչող սարքեր, որոնք այս շրջանում կիրականացնեն պարեկություն և մշտադիտարկում։ Այս մասին գրում է Jane’s ռազմական հանդեսը։
ՌԴ ԶՈւ զինծառայողները Արկտիկայում ընթացող զորավարժության ժամանակ
Հանձնաժողովի անդամներն ուրվագծել են նոր անօդաչուից պահանջվող տեխնիկական բնութագիրը, ինչպես նաև սահմանել նախագծման ավարտի ցանկալի ժամկետները։ Ըստ այդմ, անհրաժեշտ է, որ անօդաչուն կարողանա բարձրացնել 200 կգ-անոց բեռ, թռիչքներ կատարի ավեի քան 1 000 մետր բարձրության վրա և օժտված լինի օբյեկտների հայտնաբերման ու տեսահսկման ժամանակակից սարքավորումներով։ Որպես նախագծի ավարտի ցանկալի վերջնաժամկետ նշվել է 2016 թվականը։
Նշենք, որ վերջին շրջանում Ռուսաստանը բավական մեծ ակտիվություն է ցուցաբերում Արկտիկայում իր դիրքերի ամրապնդման հարցում։ Դեռևս 2013-ի դեկտեմբերին նախագահ Վլադիմիր Պուտինը հայտարարեց, որ ՌԴ-ն պետք է տիրապետի բոլոր լծակներին՝ անհրաժեշտության դեպքում Արկտիկայում իր շահերը պաշտպանելու համար։
Դրա հետ մեկտեղ Ռուսաստանն ավելացնում է նաև ռազմական ներկայությունն Արկտիկայում։ Հիշեցնենք, որ 2014-ի մարտի 14-ին Ռուսաստանի ռազմաօդային ուժերի գլխավոր հրամանատար, գեներալ-լեյտենանտ Վիկտոր Բոնդարյովն Արկտիկայում ընթացող զորավարժություններին հետևելուց հետո լրագրողներին հայտնեց, որ տարածաշրջանում առաջիկայում կբացվեն ռուսաստանյան մի քանի զինավաններ։