ՌԴ ռազմածովային ուժերի Կասպյան նավատորմիղը մարտի 15-ին դուրս է եկել Կասպից ծով՝ զորավարժություններ անցկացնելու նպատակով։
Ինչպես հաղորդում է ՌԴ ՊՆ մամուլի ծառայությունը, վարժանքներին մասնակցում են Թաթարստան ու Դաղստան հրթիռային ռազմանավերը, Ատաման Պլատով միջին դեսանտային կատերը, 4 միավոր Սերնա տիպի արագընթաց դեսատնային կատերներ։ Համաձայն աղբյուրի՝ մարտի 15-ին մեկնարկած զորավարժությունները շարունակվելու են 2 շաբաթ։
Դրանց ընթացքում նախապես գրված սցենարով Կասպյան նավատորմիղի անձնակազմն իրականացնելու է ենթադրյալ հակառակորդի վերգետնյա ու վերջրյա օբյեկտների դեմ ուղղված մշակված մարտական գործողություններ։ Վարժանքների ժամանակ կիրառվելու են հակաականային զենքեր, կազմակերպելու է նավերի հակաօդային, ինչպես նաև հակադիվերսիոն պաշտպանություն։
Հավելենք, Կասպից ծովում ռազմածովային ուժերի ներկայություն ունեն Ռուսաստանը, Ադրբեջանը, Թուրքմենստանը, Ղազախստանն ու Իրանը: Ժամանակ առ ժամանակ լարված բնույթ են ստանում հարաբերությունները Ադրբեջանի և Թուրքմենստանի միջև, նաև Ադրբեջանի ու Իրանի միջև՝ հիմնականում Կասպյան նավթահորերի շահագործման պատճառով: