Ներկայիս ռազմաքաղաքական իրավիճակում Հավաքական անվտանգության պայմանագրի կազմակերպության (ՀԱՊԿ) ամենակարևոր առաջադրանքներից մեկը կազմակերպության ուժային պոտենցիալի մեծացումն է։
Այս մասին Ռուսաստանի Պետդումայում խորհրդարանական լսումների ժամանակ հայտարարել է ՀԱՊԿ գլխավոր քարտուղար Նիկոլայ Բորդյուժան։
Բորդյուժան նշել է նաև, որ շարունակելու են ձևավորել արագ արձագանքման հավաքական ուժեր՝ ներառելով դրանց մեջ նաև ավիացիոն և հատուկ գործողությունների ուժեր։
Գլխավոր քարտուղարն անդրադարձել է նաև ՀԱՊԿ միացյալ ՀՕՊ համակարգերի ստեղծմանն ու նշել, որ այդ հարցը բավական սուր է դրված։
Մասնագետների պատրաստման մասին էլ նա նշել է, որ անհրաժեշտ է քննարկել ՀԱՊԿ-ի ղեկավարությամբ աշխատող կենտրոն, ինչպես օրինակ ամերիկյան մարշալների կենտրոնն է։
Եզրափակելով իր ելույթը՝ ՀԱՊԿ գլխավոր քատուղարը հավելել է, որ ՀԱՊԿ-ի համար կարևոր ուղղություն է նաև ահաբեկչության և ծայրահեղականության դեմ պայքարը։
Տեղեկացնենք, որ ՀԱՊԿ-ն ստեղծվել է ԱՊՀ երկրների կողմից 1992-ի մայիսի 15-ին։ Այժմ ՀԱՊԿ անդամներն են Հայաստանը, Բելառուսը, Ղազախստանը, Ղրղզստանը, Ռուսաստանը և Տաջիկստանը։