ԱՄՆ հակահրթիռային պաշտպանության գործակալությունը մարտի 11-ին հայտնել է, որ Իսրայելի հետ մարտի 5-ին կնքվել է համաձայնագիր, որով վերջինիս կհատկացվի 429 միլիոն դոլար՝ հակահրթիռային պաշտպանության Երկաթե գմբեթ համակարգի ֆինանսավորման համար։ Այս մասին հաղորդում է իսրայելական Haaretz լրատվակայքը։
Երկաթե գմբեթ ՀՀՊ համակարգի հրթիռի արձակում
Ֆինանսավորման շնորհիվ Իսրայելը հնարավորություն կունենա ոչ միայն շարունակել հրթիռային համալիրների ծավալների ընդլայնումը զինված ուժերում, այլև հիմնել դրանց համատեղ արտադրություն ԱՄՆ-ի հետ։ Այս ամենն ուղղված է Իսրայելի՝ Երկաթե գմբեթ (անգլ.՝ Iron Dome) անվանումը ստացած հակահրթիռային պաշտպանության (ՀՀՊ) համակարգի զարգացմանը։
Երկաթե գմբեթը նախագծել է Rafael Advanced Defence Systems ընկերությունը։ Այն նախատեսված է միջին և փոքր հեռահարության հրթիռները, հրետանային և ականանետային արկերը որսալու համար։ Դրա արդյունավետ աշխատանքի հեռավորությունը 4-ից 70 կմ է։
Այս համակարգի առաջին մարտկոցը Իսրայելի զինված ուժերի սպառազինությունում հերթապահության է անցել 2011-ի մարտին։ Հետագայում դրանց քանակն ավելացավ և այսօր իսրայելական բանակում հաշվվում է Երկաթե գմբեթ համակարգի 6 մարտկոց, որոնցից յուրաքանչյուրի կազմի մեջ մտնում է արձակման երեք կայան՝ ընդհանուր թվով 60 հրթիռով։
Հավելենք, որ ԱՄՆ-ի և Իսրայելի միջև կնքված այս համաձայնագրով հակահրթիռային պաշտպանության Երկաթե գմբեթ համակարգի ֆինանսավորման նպատակով 2011-ից ի վեր ԱՄՆ-ի հատկացրած ֆինանսական աջակցությունը կհասնի 930 միլիոն դոլարի։