«Մայդանից» հետո, երբ Ուկրաինայում փաստացի փոխվեց իշխանությունը, վերջին օրերին լարվածությունը տեղափոխվել է Ղրիմ, որտեղ տեղի ռուսալեզու բնակչությունը չի ընդունում Կիևում վերջերս հաստատված նոր իշխանությանը։
Արդյունքում Ղրիմում իրավիճակը վերահսկում են Ռուսաստանի զինված ուժերի ստորաբաժանումները, իսկ Ուկրաինան փորձում է իր բանակը մարտական պատրաստության բերել։ Ստեղծված իրավիճակին ավելի լավ հետևելու համար առաջարկում ենք թարմացվող լրահոսը, որտեղ գրի են առնվում ամենաթարմ ու հրատապ տեղեկություններն «առաջին գծից»։
14։42 ” ԱՄՆ ռազմածովային USS Truxtun հրթիռային ականակիրն անցել է Բոսֆորի նեղուցը և մտել Սև ծով։ Ավելի վաղ այն խարիսխ էր գցել Հունաստանի ափերին։ Պաշտոնապես ամերիկյան ռազմանավը Ռումինիայի և Բուլղարիայի ռազմածովային ուժերի հետ պետք է մասնակցի զորավարժությունների, թեև նավարկությունն այլ կերպ է ընկալվում Ուկրաինայի շուրջ իրավիճակի համատեքստում։
***
14:00 ” Ֆրանսիայի նախագահ Ֆրանսուա Օլանդը հայտարարել է, որ Ռուսաստանին տրամադրվելիք երկու Միստրալ ուղղաթիռակիրների պայմանավորվարծությունն ուժի մեջ է։ Օլանդը նշել է, որ Ֆրանսիան շարունակելու է կատարել իր ստորագրած պայմանագրի պայմանները։ Ռուսաստանը Ֆրանսիային Միստրալ ուղղաթիռակիրներ էր պատվիրել 2011 թվականին։ Գործարքը կազմում էր շուրջ 1 մլրդ ամերիկյան դոլար։ Սպասվում է, որ առաջին ուղղաթիռակիրը ՌԴ ռազմածովային ուժերի կազմում կընդգրկվի այս տարվա հոկտեմբերին։
***
12։32 ” Ուկրաինայի արտաքին գործերի նախարարությունը մարտի 5-ի երեկոյան Ուկրաինայում Ռուսաստանի դեսպանությունից պահանջել է հաստատել, որ Ղրիմում՝ ՌԴ սևծովյան նավատորմի տեղակայման վայրերից դուրս, չկան ՌԴ զինված ուժերի զինծառայողներ։ Այս մասին մարտի 6-ի երեկոյան ճեպազրույցում հայտնել է Ուկրաինայի ԱԳՆ տեղեկատվական քաղաքականության դեպարտամենտի տնօրեն Եվգենի Պերեբիյնիսը։
***
11:35 ” Պաշտոնական Վաշինգթոնը հրաժարվել է ճանաչել Ղրիմում մարտի 16-ին կայանալիք հանրաքվեն, որով որոշվելու է թերակղզու՝ Ռուսաստանին միանալ-չմիանալու հարցը։ ԱՄՆ-ն նշել է, որ միայն Կիևի օրինական կենտրոնական իշխանության մասնակցությամբ որոշումները կհամարի օրինական։
***
11։30 ” Կանադայի իշխանությունները երկրում ռազմակրթական նպատակներով ծառայություն անցնող ռուսաստանցի բոլոր 9 զինծառայողներին տվել են 24 ժամ՝ Կանադայից հեռանալու համար։ Նման քայլի պատճառը ՌԴ-ի պաշտոնական դիրքորոշումն է Ուկրաինայի հարցում և Ղրիմի՝ ՌԴ-ի կազմում ընդգրկվելու որոշումը։
Ավելի վաղ՝
Իրադրությունը Ղրիմում. մարտի 3. թարմացվող լրահոս
Իրադրությունը Ղրիմում. մարտի 4. թարմացվող լրահոս