Թուրքիայի Իզմիր նահանգում անհայտ անձինք հարձակվել են զինվորական բեռնատարի վրա՝ քարեր ու փայտեր նետելով ավտոմեքենայի ուղղությամբ և վիրավորելով 2 զինծառայողի։
Թուրքիայի ԶՈւ գլխավոր շտաբի փոխանցմամբ՝ փետրվարի 27-ին 40-50 հոգանոց խմբի անդամները, ովքեր դիմակներ են կրել, քարերով, փայտերով հարվածել են լուսաֆորի կարմիր լույսի տակ կանգ առած ռազմական բեռնատարին։
Ռազմական բեռնատարը պատկանել է Թուրքիայի ԶՈւ ռազմածովային ուժերի։
Հարձակումից հետո խումբը փախուստի է դիմել, դեռ չի հաջողվել հայտնաբերել նրա անդամներին։ Չեն նշվում նաև հարձակման հնարավոր դրդապատճառները։
Հարձակումից հետո վնասվել են թուրքական զինուժի ավտոմեքենան, ինչպես նաև մարմնական վնասվածք է ստացել երկու զինծառայող, ովքեր տեղափոխվել են հիվանդանոց։