Էրեբունի օդակայանում մեկնարկել է ռազմական օբյեկտների կառուցման աշխատանքը

ՀՀ-ում տեղակայված ռուսաստանյան 102-րդ ռազմաբազայում մեկնարկել է Էրեբունի օդակայանում ռազմական և հատուկ նշանակության օբյեկտների կառուցման աշխատանքները։ Դրանք նախատեսված են լինելու ռազմական ավիացիայի օդաչուների համար։
Ինչպես հաղորդում է ՌԴ զինված ուժերի հարավային ռազմական օկրուգի մամուլի ծառայությունը, աշխատանքներն ընթանում են երկու փուլով։
Առաջին փուլում կառուցվելու են ուղղաթիռների խմբային կայանման տեղեր, շարժիչների փորձարկման հարթակներ, թռիչքային, տեխնիկական սպասարկման, վերելք-վայրէջք ուսանելու հարթակներ։ Բացի այդ, այս փուլում նախատեսվում է ջրատար ցանցի և կոյուղային համակարգի, շվաքարանի, պահեստների կառուցումը։
Երկրորդ փուլում ծրագրել են կառուցել մշակութային-ժամանցային կենտրոն, կազմավորել օդակայանային ենթակառուցվածքային համակարգ։
Կարևոր է նշել, որ Էրեբունի օդակայանն ավիատեխնիկա է ստանալու 2014-ի երրորդ քառորդին։ Նկատենք, որ դեռևս 2014-ի հունվարի սկզբին հայտնի էր դարձել՝ 102-րդ ռազմակայանի բաղադրիչ Էրեբունի օդանավակայանում օկրուգի հրամանատարությունը կազմավորում է Մի-24Պ, Մի-8ՄՏ, Մի-8ՍՄՎ ուղղաթիռների էսկադրիլիա։
Համաձայն աղբյուրի՝ յուրաքանչյուր ուղղաթիռի համար կայանում արդեն տեղ է հատկացված, որոշված են վերգետնյա տեխնիկական սպասարկման միջոցները։
Հիշեցնենք, որ Ռուսաստանի 102-րդ ռազմաբազան տեղակայվել է Գյումրիում 1995 թվականին և իրականացնում է մարտական հերթապահություն ԱՊՀ ՀՕՊ Միասնական համակարգի շրջանակներում։ Պայմանագիրը նախապես կնքվել էր 25 տարի ժամկետով, իսկ 2010 թվականին ՌԴ նախագահ Դմիտրի Մեդվեդևի այցի ժամանակ այն երկարաձգվեց ևս 49 տարով։