Ռուս-ամերիկա-կանադական «Զգոն արծիվ 2014» զորավարժությունն այս տարի անցկացվելու է օգոստոսին։ Զորավարժության մասնակիցներն այժմ մշակում են իրենց համատեղ գործողությունները համակարգիչների և էլեկտրոնային քարտեզների միջոցով։
Այս մասին հայտնում է ռուսաստանյան «ԻՏԱՌ-ՏԱՍՍ» լրատվական գործակալությունը՝ հղում անելով ՌԴ ԶՈւ Արևելյան ռազմական օկրուգի մամուլի ծառայության ղեկավար փոխգնդապետ Ալեքսանդր Գորդեևին։
Նշենք, որ զորավարժության ժամանակ ղեկավարման կենտրոններ են լինելու Խաբարովսկ և Կոլորադո-Սփրինգս, ինչպես նաև Պետրոպավլովսկ քաղաքներում, իսկ ահա զորավարժությունն անցնելու է ԱՄՆ-ի Անկորիջ քաղաքում։
Զորավարժության ընթացքում անձնակազմները փորձարկելու են, թե ինչպես ահաբեկիչների կողմից բռնագրավված ինքնաթիռը հարկադիր վայրէջքի տանեն կամ էլ վերադարձնեն։ Փորձարկվելու են նաև որոնողափրկարարական համատեղ գործողություններ։
Նշենք, որ ռուս-ամերիկյան «Զգոն արծիվ» զորավարժությունն անցկացվում է 2010 թվականից։